ທ່ານ ສີຈິ້ນຜິງ ກ່າວວ່າ: ການປະຕິຮູບແລະໄຂປະຕູສູ່ພາຍນອກຂອງຈີນໄດ້ມີຜົນສະທ້ອນຕໍ່ໂລກຢ່າງເລິກເຊິ່ງ
2018-04-10 11:02:15 cri
ໃນເວລາກ່າວປາຖະກະຖາຢູ່ເວທີປຶກສາຫາລືອາຊີໂປອາວທີ່ຈັດຂຶ້ນໃນວັນທີ 10 ເມສານີ້, ທ່ານ ສີຈິ້ນຜິງ ປະທານປະເທດຈີນກ່າວວ່າ, ໃນຮອບ 40 ປີມານີ້, ຈີນໄດ້ບັນລຸການຫັນປ່ຽນຢ່າງຍິ່ງໃຫຍ່ຄືຈາກການປິດປະຕູແລະປິດປະຕູເຄິ່ງໜຶ່ງຫັນໄປສູ່ການເປີດປະຕູຢ່າງຮອບດ້ານ, ໄດ້ແບກຫາບໜ້າທີ່ຮັບຜິດຊອບຂອງປະເທດໃຫຍ່ໃນການເປີດປະຕູສູ່ພາຍນອກ, ຈາກການນຳເຂົ້າຫັນໄປສູ່ການໄປພັດທະນາຢູ່ຕ່າງປະເທດ, ຈາກການເຂົ້າຮ່ວມອົງການການຄ້າໂລກ ໄປສູ່ການຮ່ວມສ້າງ "ໜຶ່ງແລວໜຶ່ງເສັ້ນທາງ", ໄດ້ປະກອບສ່ວນອັນໃຫຍ່ຫຼວງເພື່ອຮັບມືກັບວິກິດການການເງິນອາຊີແລະວິກິດການການເງິນສາກົນ, ອັດຕາການປະກອບສ່ວນຕໍ່ການເຕີບໂຕຂອງເສດຖະກິດໂລກຫຼາຍ ກວ່າ 30% ໃນຫຼາຍປີຕິດຕໍ່ກັນ, ກາຍເປັນກຸ່ມເສດຖະກິດຕົ້ນຕໍທີ່ຊຸກຍູ້ແລະເພີ່ມກຳລັງໃຫ້ແກ່ການເຕີບໂຕຂອງເສດຖະກິດໂລກ ແລະ ໄດ້ຊຸກຍູ້ພາລະກິດອັນສູງສົ່ງແຫ່ງສັນຕິພາບແລະການພັດທະນາຂອງມວນມະນຸດ. ການປະຕິຮູບແລະເປີດປະຕູສູ່ພາຍນອກ ເປັນການປະຕິວັດຄັ້ງທີສອງຂອງຈີນ ເຊິ່ງໄດ້ສອດຄ່ອງກັບຄວາມຮຽກຮ້ອງຕ້ອງການຄັ້ງປະຫວັດສາດຂອງປະຊາຊົນທີ່ຕ້ອງການພັດທະນາ, ຕ້ອງການປະດິດສ້າງໃໝ່ ແລະຕ້ອງການຊີວິດການເປັນຢູ່ທີ່ສວຍງາມ, ທັງຖືກກັບແປວກະແສຍຸກສະໄໝທີ່ປະຊາຄົມບັນດາປະເທດໃນໂລກຕ້ອງການການພັດທະນາ, ຕ້ອງການການຮ່ວມມື ແລະຕ້ອງການຊີວິດການເປັນຢູ່ໂດຍສັນຕິ.