ທ່ານ ເກິງສວງ ໂຄສົກກະຊວງການຕ່າງປະເທດຈີນກ່າວໃນວັນທີ 9 ເມສານີ້ວ່າ, ບຸກຄົນຜູ້ມີຄວາມຮູ້ໃນປະຊາຄົມໂລກມີຄວາມຮັບຮູ້ໂດຍທົ່ວໄປວ່າ, ລັດທິຝ່າຍດຽວ ແລະ ລັດທິປົກປ້ອງການຄ້າ ບໍ່ແມ່ນທາງອອກ, ການຮ່ວມມືສາກົນ ແລະ ການປະສານງານຫຼາຍຝ່າຍ ຈຶ່ງແມ່ນທາງອອກ, ລະບຽບສາກົນທີ່ຖືກະຕິກາເປັນພື້ນຖານນັ້ນ ຄວນໄດ້ຮັບການເຄົາລົບ.
ຫວ່າງມໍ່ໆມານີ້, ຜູ້ນຳຫຼາຍປະເທດ ເຊັ່ນ ໂອຕຼິສ, ໂຮນລັງ ແລະສິງກະໂປເປັນຕົ້ນ ພ້ອມດ້ວຍຜູ້ຮັບຜິດຊອບອົງການຈັດຕັ້ງສາກົນ ເຊັ່ນ ເລຂາທິການໃຫຍ່ອົງການສະຫະປະຊາຊາດເປັນຕົ້ນ ໄດ້ເດີນທາງມາຢ້ຽມຢາມຈີນ ແລະ ເຂົ້າຮ່ວມກອງປະຊຸມປະຈຳປີຂອງເວທີປຶກສາຫາລືອາຊີໂປອາວ. ໃນໂອກາດພົບປະ ແລະ ພົບປະເຈລະຈາກັບຜູ້ນຳຈີນ, ບັນດາທ່ານໄດ້ກ່າວວ່າ, ຕ້ອງປົກປ້ອງລະບົບການຄ້າເສລີ, ຊຸກຍູ້ເສລີພາບແລະຄວາມສະດວກທາງການຄ້າແລະການລົງທຶນ. ກ່ຽວກັບເລື່ອງນີ້, ທ່ານ ເກີງສວງ ໄດ້ຕອບຄຳຖາມຂອງນັກຂ່າວວ່າ, ປັດຈຸບັນ, ຝ່າຍຕ່າງໆລ້ວນແຕ່ເອົາໃຈໃສ່ສູງຕໍ່ການພົວພັນເສດຖະກິດການຄ້າລະຫວ່າງຈີນກັບອາເມລິກາ, ເພາະວ່າມັນກ່ຽວພັນເຖິງບັນຫາຫຼັກການທີ່ໃຫຍ່ຫຼວງ ຄື: ກະຕິກາສາກົນຕ້ອງເຄົາລົບຫຼືບໍ່, ໂຄງປະກອບ ຫຼາຍຝ່າຍຕ້ອງປົກປັກຮັກສາຫຼືບໍ່ ແລະ ເສດຖະກິດໂລກາພິວັດຕ້ອງຊຸກຍູ້ຫຼືບໍ່, ຈີນຍິນດີຮ່ວມກັບປະຊາຄົມໂລກ, ຮ່ວມກັນສ້າງເສດຖະກິດໂລກແບບເປີດປະຕູ, ຊຸກຍູ້ເສດຖະກິດໂລກາພິວັດໃຫ້ຂະຫຍາຍໄປສູ່ທິດທາງທີ່ເປີດປະຕູ, ກວມລວມ, ສ້າງຜົນປະໂຫຍດໃຫ້ທົ່ວເຖິງ, ກ້ຳເກິ່ງກັນ ແລະຕ່າງຝ່າຍຕ່າງໄດ້ຮັບຜົນປະໂຫຍດຫຼາຍກວ່າເກົ່າ, ປະກອບສ່ວນໃຫຍ່ກວ່າເກົ່າເພື່ອຄວາມກ້າວໜ້າຂອງມວນມະນຸດ.
 |
