ວັນທີ 10 ເມສານີ້ຢູ່ຫໍຮັບແຂກເມືອງທີ່ໂປອາວແຂວງໄຫຫຼຳ ສປ ຈີນ, ທ່ານສີຈິ້ນຜິງ ປະທານປະເທດຈີນໄດ້ພົບປະກັບທ່ານລີຊຽນລົງ, ນາຍົກລັດຖະມົນຕີສິງກະໂປ.
ທ່ານສີຈິ້ນຜິງ ຊີ້ໃຫ້ເຫັນວ່າ, ການພັດທະນາສາຍພົວພັນລະຫວ່າງຈີນ-ສິງກະໂປກ່ຽວພັນເຖິງການປະຕິຮູບຂອງຈີນຢ່າງໃກ້ຊິດ. ປັດຈຸບັນ, ສັງຄົມນິຍົມທີ່ມີສີສັນພິເສດຂອງຈີນໄດ້ກ້າວເຂົ້າສູ່ໄລຍະໃໝ່, ຂະນະທີ່ສິງກະໂປພວມປະຕິບັດ "ຍຸດທະສາດການພັດທະນາເສດຖະກິດໃນອະນາຄົດ". ສອງຝ່າຍຄວນປະສານສົມທົບກັບຈຸດພິເສດໃໝ່ໃນສະຖານະການໃໝ່, ວາງແຜນຍຸດທະສາດແລະອອກແບບຈາກຊັ້ນສູງກ່ຽວກັບສາຍພົວພັນແລະການຮ່ວມມືທີ່ແທ້ຈິງລະຫວ່າງສອງຝ່າຍ. ນອກນີ້ຄວນຊຸກຍູ້ການຮ່ວມມືດ້ານໂຄງການໃຫຍ່ລະຫວ່າງລັດຖະບານ. ຈີນຍິນດີເພີ່ມທະວີການແລກປ່ຽນແລະປຶກສາຫາລືກັບປະເທດອາຊຽນລວມທັງສີງກະໂປ, ເພື່ອໃຫ້ບັນລຸຂໍ້ລິເລີ່ມ "ໜຶ່ງແລວໜຶ່ງເສັ້ນທາງ" ເຊື່ອມຈອດກັນກັບແຜນການພັດທະນາຂອງອາຊຽນໃຫ້ດີກວ່າເກົ່າ, ສ້າງປະຊາຄົມຮ່ວມຊາຕາກຳຈີນ-ອາຊຽນທີ່ແໜ້ນແຟ້ນກວ່າເກົ່າ, ຫວັງວ່າສິງກະໂປສາມາດເສີມຂະຫຍາຍບົດບາດຢ່າງຕັ້ງໜ້າທີ່ມີລັກສະນະສ້າງສັນ.
ທ່ານລີຊຽນລົງ ກ່າວວ່າ, ປະເທດຕົນສະໜັບສະໜູນລະບົບແລະລະບຽບການສາກົນບົນພື້ນຖານກະຕິກາສາກົນ, ມີຈຸດຢືນຮັບມືກັບບັນຫາແລະສິ່ງທ້າທາຍຈາກທົ່ວໂລກໂດຍຜ່ານການຮ່ວມມືສາກົນ. ປະເທດຕ່າງໆຄວນແກ້ໄຂການພົວພັນໂດຍຜ່ານແນວທາງສັນຕິວິທີທີ່ມີລັກສະນະສ້າງສັນ. ນະໂຍບາຍຂອງກອງປະຊຸມໃຫຍ່ຜູ້ແທນທົ່ວປະເທດຂອງພັກກອມມູນິດຈີນຄັ້ງທີ 19 ແລະກອງປະຊຸມສອງສະພາທີ່ຫາກໍ່ສິ້ນສຸດລົງໄດ້ສະແດງໃຫ້ເຫັນແຜນການກຳນົດທີ່ມີວິໄສທັດເບິ່ງກວ້າງເຫັນໄກຕໍ່ການພັດທະນາຂອງຕົນແລະການສະໜັບສະໜູນຕໍ່ລະບົບສາກົນ. ປັດຈຸບັນການຮ່ວມມືລະຫວ່າງສິງກະໂປແລະຈີນໄດ້ກ້າວໄປໜ້າພ້ອມກັບຍຸກສະໄໝແລະນັບມື້ນັບກ້າວເຂົ້າສູ່ລວງເລິກ. ປະເທດຕົນສຸມກຳລັງເພື່ອລົງເລິກສາຍພົວພັນລະຫວ່າງສອງປະເທດ, ຊຸກຍູ້ໂຄງການສຳຄັນແລະການຮ່ວມມືພາຍໃຕ້ຂອບ "ໜຶ່ງແລວໜຶ່ງເສັ້ນທາງ" ລະຫວ່າງສອງປະເທດ. ແລະສິງກະໂປກໍ່ສະໜັບສະໜູນເພີ່ມທະວີການພົວພັນລະຫວ່າງອາຊຽນແລະຈີນດ້ວຍຄວາມຈິງໃຈ.