ຜູ້ຮັບຜິດຊອບທີ່ກ່ຽວຂ້ອງກົມສັງລວມຂອງອົງການສະຖິຕິແຫ່ງຊາດຈີນກ່າວໃນວັນທີ 10 ເມສານີ້ວ່າ, ໃນຫຼາຍປີຜ່ານມາ, ພາກສ່ວນຕ່າງໆຂອງທ້ອງຖິ່ນຕ່າງໆໄດ້ອອກແຮງເສີມຂະຫຍາຍບົດບາດພື້ນຖານຂອງການບໍລິໂພກແລະບົດບາດຂໍກະແຈຂອງການລົງທຶນທີ່ມີຕໍ່ການປັບປຸງໂຄງປະກອບຄວາມຕ້ອງການແລະການສະໜອງໃຫ້ດີຂຶ້ນ, ສົ່ງຜົນເຮັດໃຫ້ຄວາມຕ້ອງການພາຍໃນມີການປະກອບສ່ວນຕໍ່ການເຕີບໂຕຂອງເສດຖະກິດຈີນຫຼາຍຂຶ້ນເລື້ອຍໆ, ແລະໄດ້ກາຍເປັນກຳລັງຕັດສິນທີ່ຊຸກຍູ້ການພັດທະນາເສດຖະກິດ.
ຕາມສະຖິຕິ, ໃນປີ 2017, ຄ່າໃຊ້ຈ່າຍອຸປະໂພກບໍລິໂພກໄດ້ປະກອບສ່ວນເຖິງ 58,8% ຕໍ່ການຊຸກຍູ້ການເຕີບໂຕຂອງເສດຖະກິດ, ທຽບໃສ່ປີ 2007 ເພີ່ມຂຶ້ນ 13,5%. ໃນ 2 ເດືອນຕົ້ນປີນີ້, ຍອດມູນຄ່າຂາຍຍ່ອຍຂອງສິນຄ້າອຸປະໂພກບໍລິໂພກທຽບໃສ່ໄລຍະດຽວກັນຂອງປີຜ່ານມາເພີ່ມຂຶ້ນ 9,7%, ຄວາມໄວເຕີບໂຕສູງກວ່າໄລຍະດຽວກັນຂອງປີຜ່ານມາ 0,2%.
ນັກວິຊາການຂອງອົງການສະຖິຕິແຫ່ງຊາດຈີນວິເຄາະວ່າ, ຄຽງຄູ່ກັບການປະຕິຮູບໂຄງປະກອບດ້ານການສະໜອງດຳເນີນໄປຢ່າງຕໍ່ເນື່ອງແລະການປະຕິບັດຍຸດທະສາດການພັດທະນາໂດຍຜ່ານການປະດິດສ້າງໃໝ່ໄດ້ເຂົ້າລວງເລິກ, ພະລັງຊີວິດແລະແຮງຊຸກດັນຈາກ ຄວາມຕ້ອງການພາຍໃນໄລຍະຕໍ່ໜ້າຈະປະກົດອອກຢ່າງຕໍ່ເນື່ອງ, ແລະຈະເສີມຂະຫຍາຍບົດບາດຊຸກຍູ້ການພັດທະນາເສດຖະກິດໃນໄລຍະຍາວ.
 |
