ວັນທີ 10 ເມສານີ້, ທ່ານສີຈິ້ນຜິງ ປະທານປະເທດຈີນໄດ້ກ່າວປາໄສສຳຄັນໃນກອງປະຊຸມເວທີປຶກສາຫາລືອາຊີໂປອາວໂດຍໄດ້ບັນລະຍາຍຕື່ມອີກກ່ຽວກັບນະໂຍບາຍແລະມາດຕະການສຳຄັນຂອງຈີນໃນການປະຕິຮູບແລະເປີດປະຕູສູ່ພາຍນອກ, ປະຊາຄົມໂລກໄດ້ຕີລາຄາສູງຕໍ່ຄຳປາໄສຂອງທ່ານສີຈີ້ນຜິງ. ທ່ານໂດນັນ ທຣຳ ປະທານາທິບໍດີອາເມລິກາກໍໄດ້ ຕອບຮັບດ້ວຍດີສົມຄວນ.
ນັກວິເຄາະຂອງໂທລະພາບສູນກາງຈີນກ່າວວ່າ, ຄຳປາໄສຂອງທ່ານສີຈິ້ນຜິງໃນພິທີໄຂກອງປະຊຸມເວທີປຶກສາຫາລືອາຊີໂປອາວ, ໄດ້ບັນລະຍາຍນະໂຍບາຍແລະມາດຕະການສຳຄັນຂອງຈີນໃນການປະຕິຮູບແລະເປີດປະຕູສູ່ພາຍນອກ ເຊິ່ງໄດ້ຮັບການຕີລາຄາສູງຈາກປະຊາຄົມໂລກ. ນີ້ແມ່ນມາດຕະການສຳຄັນແຫ່ງການປະຕິຮູບແລະເປີດປະຕູສູ່ພາຍນອກຂອງຈີນ, ຈີນຊຸກຍູ້ການເປີດປະຕູສູ່ພາຍນອກຕື່ມອີກຕາມທິດທາງທີ່ໄດ້ກຳນົດໄວ້.
ຄຳປາໄສຂອງທ່ານສີຈິ້ນຜິງໄດ້ລະບຸວ່າ:ນັບຕັ້ງແຕ່ຈີນປະຕິບັດການປະຕິຮູບແລະເປີດປະຕູສູ່ພາຍນອກເປັນເວລາ 40 ປີມານີ້, ປະຊາຊົນຈີນຍຶດໝັ້ນນະໂຍບາຍພື້ນຖານແຫ່ງຊາດທີ່ເປີດປະຕູສູ່ພາຍນອກ, ຍຶດໝັ້ນການສ້າງສາປະເທດແບບເປີດປະຕູ, ແລະໄດ້ບັນລຸການປ່ຽນແປງຢ່າງຍິ່ງໃຫຍ່ ຈາກການປິດປະຕູ,ເຄິ່ງປິດປະຕູຮອດເປີດປະຕູຢ່າງຮອບດ້ານ, ໄດ້ກາຍເປັນແມ່ແຮງສຳຄັນຊຸກຍູ້ການເຕີບໂຕທັງຮັບປະກັນຄວາມໝັ້ນຄົງຂອງເສດຖະກິດໂລກ, ໄດ້ ປະກອບສ່ວນຂອງຕົນໃຫ້ແກ່ສັນຕິພາບແລະການພັດທະນາເຊິ່ງເປັນພາລາກິດອັນສູງສົ່ງຂອງມວນມະນຸດ.
ນັກວິເຄາະທ່ານນີ້ກ່າວຕື່ມວ່າ, ວັນທີ 11 ເມສານີ້, ທ່ານຢີ້ກ່າງ, ຜູ້ວ່າການທະນາຄານປະຊາຊົນຈີນໄດ້ເປີດເຜີຍມາດຕະການລະອຽດແລະຕາຕະລາງເວລາໃນການເປີດກວ້າງການເປີດປະຕູສູ່ພາຍນອກຂອງຂະແໜງການເງິນຂອງຈີນ, ນີ້ສະແດງໃຫ້ເຫັນວ່າຈີນໄດ້ປະຕິບັດຕາມຄຳໝັ້ນສັນຍາຂອງຕົນໃຫ້ໄດ້ຮັບຜົນສຳເລັດ. ຖ້າວ່າອາເມລິກາຝືນເຮັດສົງຄາມການຄ້າ, ກໍຈະເສຍໂອກາດຮ່ວມມືຕື່ມອີກລະຫວ່າງສອງຝ່າຍ, ທັງຈະເສຍໂອກາດທີ່ແປ່ງປັນຜົນປະໂຫຍດຈາກການພັດທະນາແບບເປີດປະຕູຂອງຈີນ.
ຈີນດີໃຈທີ່ ອາເມລິກາໄດ້ສົ່ງສັນຍານທີ່ດີ, ແຕ່ຕ້ອງຕິດຕາມເບິ່ງຕົວຈິງ, ຂໍກະແຈແມ່ນມາດຕະການຂັ້ນຕໍ່ໄປຂອງອາເມລິກາ. ຫວັງວ່າອາເມລິກາສາມາດຮັບຮູ້ສະຖານະການຢ່າງຄັກແນ່, ມາດຕະການແຕ່ຝ່າຍດຽວໃນການຄ້າແມ່ນເລື່ອງທີ່ຮັບຮອງບໍ່ໄດ້, ການພັດທະນາແລະເຊື່ອມຈອດກັນແມ່ນກະແສໃນຍຸກປັດຈຸບັນ, ນີ້ຕ້ອງການຄວາມຮັບປະກັນຂອງລະບົບການຄ້າຫຼາຍຝ່າຍ, ແລະຄັດຄ້ານລັດທິຝ່າຍດຽວ, ຄວນຍຶດໝັ້ນຫຼັກໝັ້ນສ້າງຜົນປະໂຫຍດໃຫ້ແກ່ກັນຈຶ່ງສາມາດສ້າງສະພາບການທີ່ຕ່າງຝ່າຍຕ່າງໄດ້ຜົນປະໂຫຍດ.