ທ່ານ ວາງຢີ້ ທີ່ປຶກສາແຫ່ງລັດ ທັງເປັນລັດຖະມົນຕີກະຊວງການຕ່າງປະເທດຈີນ ໄດ້ເຂົ້າຮ່ວມກິດຈະກຳພາຍໃຕ້ຫົວຂໍ້ "ສະແດງຄວາມເຄົາລົບແລະສືບທອດ" ຂອງສະມາຊິກເກົ່າແລະໃໝ່ສະພາມົນຕີເວທີປຶກສາຫາລືອາຊີໂປອາວໃນວັນທີ 10 ເມສານີ້ ແລະໄດ້ປະກອບຄຳຄິດຄຳເຫັນ.
ໂອກາດດັ່ງກ່າວ, ທ່ານ ວາງຢີ້ ໄດ້ຕາງໜ້າລັດຖະບານປະເທດເຈົ້າພາບ ສະແດງຄວາມຂອບໃຈຕໍ່ບັນດາສະມາຊິກສະພາມົນຕີແລະກຳມະການໃຫ້ຄຳປຶກສາທີ່ໄດ້ປະກອບສ່ວນອັນລ້ຳຄ່າເພື່ອການພັດທະນາຂອງເວທີປຶກສາຫາລື ແລະຫວັງວ່າ, ສະພາມົນຕີຊຸດໃໝ່ ຈະສືບທອດຈິດໃຈໂປອາວ ແລະສ້າງເວທີປຶກສາຫາລືໃຫ້ເປັນຍີ່ຫໍ້ລະດັບໜຶ່ງຂອງໂລກ.
ທ່ານ ວາງຢີ້ ກ່າວຕື່ມວ່າ, ການປາຖະກະຖາອັນສຳຄັນທີ່ທ່ານປະທານ ສີຈິ້ນຜິງ ກ່າວໃນກອງປະຊຸມປະຈຳປີຂອງເວທີປຶກສາຫາລືໃນຕອນເຊົ້ານັ້ນ ພວມເຜີຍແຜ່ໄປສູ່ທົ່ວໂລກ, ເຊື່ອວ່າ ທຸກປະເທດໃນໂລກ ລວມທັງປະເທດທີ່ຢູ່ຝັ່ງກົງກັນຂ້າມມະຫາສະໝຸດ ລ້ວນແຕ່ຈະໄດ້ຮັບສັນຍານທີ່ສຳຄັນແລະຕັ້ງໜ້າເຫຼົ່ານີ້.
ທ່ານ ວາງຢີ້ ກ່າວອີກວ່າ, ເວທີປຶກສາຫາລືອາຊີໂປອາວ ຈະພັດທະນາກ້າວໄປໜ້າຢ່າງແນ່ນອນ, ເພາະວ່າ, ແຂວງໄຫຫຼຳພວມພັດທະນາ, ຈີນພວມພັດທະນາ ແລະອາຊີພວມພັດທະນາ. ເວທີປຶກສາຫາລືອາຊີໂປອາວ ຈະປະສົບຜົນສຳເລັດຢ່າງແນ່ນອນ, ເພາະວ່າຈີນຈະປະສົບຜົນສຳເລັດຢ່າງແນ່ນອນ, ອາຊີຈະປະສົບຜົນສຳເລັດຢ່າງແນ່ນອນ ແລະ ທຸກໆປະເທດທີ່ອ້ອມກອດໂລກາພິວັດນັ້ນລ້ວນແຕ່ຈະປະສົບຜົນສຳເລັດຢ່າງແນ່ນອນ.