CPI ແລະ PPI ຂອງ​ຈີນ​ໃນ​ເດືອນ​ມີ​ນາ​ຜ່ານ​ມາຫຼຸດ​ລົງ​ໜ້ອຍ​ໜຶ່ງ
2018-04-11 16:40:27  cri 
    ວັນ​ທີ 11 ເມ​ສານີ້, ອົງ​ການ​ສະ​ຖິ​ຕິ​ແຫ່ງ​ຊາດ​ຈີນ ໄດ້​ເປີດ​ເຜີຍ​ຂໍ້​ມູນ ສະ​ແດງ​ໃຫ້​ເຫັນ​ວ່າ, ດັດ​ຊະ​ນີ​ລາ​ຄາ​ຜູ້​ຊົມ​ໃຊ້ ຫຼື CPI ໄດ້ຫຼຸດ​ລົງ 1,1% ເມື່ອ​ທຽບ​ໃສ່​ເດືອນ​ກຸມ​ພາຜ່ານ​ມາ ແລະ​ເພີ່ມ​ຂຶ້ນ 2,1% ເມື່ອ​ທ​ຽບ​ໃສ່​ເດືອນ​ມີ​ນາ​ປີ​ຜ່ານ​ມາ, ດັດ​ຊະ​ນີ​ລາ​ຄາ​ການ​ຜະ​ລິດ ຫຼື PPI ໄດ້ຫຼຸດ​ລົງ 0,2% ເມື່ອ​ທ​ຽບ​ໃສ່​ເດືອນ​ກຸມ​ພາ​ຜ່ານ​ມາ ແລະ​ເພີ່ມ​ຂຶ້ນ 3,1% ເມື່ອ​ທຽບ​ໃສ່​ເດືອນ​ມີ​ນາ​ປີ​ຜ່ານ​ມາ. ໝາຍ​ຄວາມ​ວ່າ, ລະ​ດັບເພີ່ມ​ຂຶ້ນ​ຂອງ CPI ແລະ PPI ທີ່​ທຽບ​ໃສ່​ເດືອນ​ມີ​ນາ​ປີ​ຜ່ານ​ມານັ້ນ ລ້ວນ​ແຕ່ຫຼຸດ​ໜ້ອຍ​ລົງ.

    CPI ຂອງ​ຈີນ​ໃນ​ເດືອນ​ມີ​ນາ​ຜ່ານ​ມາ​ໄດ້​ເພີ່ມ​ຂຶ້ນ 2,1% ເມື່ອ​ທຽບ​ໃສ່​ເດືອນ​ມີ​ນາ​ປີ​ຜ່ານ​ມາ, ໜ້າ​ພຽງ​ເພີ່ມ​ຂຶ້ນ​ໄດ້ຫຼຸດ​ຕ່ຳ​ລົງ 0,8% ຢ່າງຫຼວງຫຼາຍ​ເມື່ອ​ທຽບ​ໃສ່​ເດືອນ​ກຸມ​ພາ​ຜ່ານ​ມາ. ທ່ານ ຊີ​ຮົງ​ໄຊ ຮອງ​ນັກ​ເສດ​ຖະ​ສາດ​ໃຫຍ່​ຂອງ​ສູນ​ແລກ​ປ່ຽນ​ເສດ​ຖະ​ກິດ​ສາ​ກົນ​ຈີນ ເຫັນ​ວ່າ, ໃນ​ເດືອນ​ມີ​ນາ​ຜ່ານ​ມາ, CPI ໄດ້​ຈາກ​ການ​ເພີ່ມ​ຂຶ້ນ​ຫັນ​ມາຫຼຸດ​ລົງ ຕົ້ນ​ຕໍ​ແມ່ນ​ຍ້ອນ​ປັດ​ໄຈ​ໃນ​ວັນ​ບຸນ​ຜ່ານ​ໄປ.

    ຂໍ້​ມູນ​ລະ​ອຽດ​ສະ​ແດງ​ໃຫ້​ເຫັນ​ວ່າ, ໃນ​ເດືອນ​ມີ​ນາ​ຜ່ານ​ມາ, ລາ​ຄາ​ອາ​ຫານ ໄດ້​ສູງ​ຂຶ້ນ 2,1%, ເຊິ່ງ​ຕ່ຳ​ກວ່າ​ເດືອນ​ກຸມ​ພາ​ຜ່ານ​ມາ 2,3%.

    ຂໍ້​ມູນ PPI ທີ່​ເປີດ​ເຜີຍ​ພ້ອມ​ກັນ​ສະ​ແດງ​ໃຫ້​ເຫັນ​ວ່າ, ໃນ​ເດືອນ​ມີ​ນາ​ຜ່ານ​ມາ, ດັດ​ຊະ​ນີ​ດັ່ງ​ກ່າວ​ໄດ້​ເພີ່ມ​ຂຶ້ນ 3,1% ເມື່ອ​ທຽບ​ໃສ່​ເດືອນ​ມີ​ນາ​ປີ​ຜ່ານ​ມາ ແລະ​ເປັນ​ເດືອນ​ທີ 5 ທີ່​​ລະ​ດັບ​ເພີ່ມ​ຂຶ້ນຫຼຸດ​ຕ່ຳ​ລົງ​ຢ່າງ​ຕິດ​ຕໍ່​ກັນ.

    ເມື່ອ​ເບິ່ງ​ຈາກ​ຂໍ້​ມູນຂອງ​ຂະ​ແໜງ​ການ​ແລ້ວ​ເຫັນ​ວ່າ, ໃນ​ເດືອນ​ມີ​ນາ​ຜ່ານ​ມາ, ໃນ​ຂະ​ແໜງ​ການ​ຕົ້ນ​ຕໍ​ຕ່າງໆ, ​ລະ​ດັບ​ເພີ່ມ​ຂຶ້ນ​ໄດ້ຫຼຸດ​ຕ່ຳ​ລົງ​ມີ: ຂະ​ແໜງ​ການ​ຜະ​ລິດ​ບໍ່​ແຮ່​ທີ່​ບໍ່​ແມ່ນ​ໂລ​ຫະ, ການຫຼໍ່ຫຼອມ​ໂລ​ຫະ​ສີ​ດຳ, ຂະ​ແໜງ​ການ​ປຸງ​ແຕ່ງ​ນ້ຳ​ມັນ​ເຊື້ອ​ໄຟ-ຖ່ານ​ຫີນ​ແລະ​ວັດ​ຖຸ​ເຊື້ອ​ໄຟ​ອື່ນໆ, ຂະ​ແໜງ​ການ​ຂຸດ​ຄົ້ນ​ນ້ຳ​ມັນ​ດິບ​ແລະ​ອາຍ​ແກັ​ສ​ທຳ​ມະ​ຊາດ ແລະ​ອື່ນໆ, ລວມ​ເຂົ້າ​ກັນ​ແລ້ວ ໄດ້​ກະ​ທົບ​ໃຫ້​​ລະ​ດັບ​ເພີ່ມ​ຂຶ້ນ​ຂອງ PPI ຫຼຸດ​ຕ່ຳ​ລົງ​ປະ​ມານ 0,43%.

    ກ່ຽວ​ກັບ​ເລື່ອງ​ທີ່​ວົງ​ການ​ພາຍນອກ​ເປັນ​ຫ່ວງວ່າ, ຄວາມ​ຂັດ​ແຍ້ງ​ກັນ​ດ້ານ​ການ​ຄ້າ​ລະ​ຫວ່າງ​ຈີນ​ກັບ​ອາ​ເມ​ລິ​ກາ ອາດ​ຈະ​ເຮັດ​ໃຫ້​ລາ​ຄາ​ສິນ​ຄ້າ​ສູງ​ຂຶ້ນຫຼາຍກວ່າ​ເກົ່າ, ທ່ານ ຊີ​ຮົງ​ໄຊ ຕອບ​ວ່າ:

    "ຂ້າ​ພະ​ເຈົ້າ​ຮູ້​ສຶກວ່າ ມີ​ຄວາມ​ອາດ​ເປັນ​ໄປ​ໄດ້​ໜ້ອຍ​ທີ່​ສຸດ, ເພາະ​ວ່າ, ຍັງຊອກ​ຫາ​ວິ​ທີ​ແກ້​ໄຂ​ຄວາມ​ຂັດ​ແຍ້ງ​ກັນ​ດ້ານ​ການ​ຄ້າ​ຈີນ-ອາ​ເມ​ລິ​ກາ, ຍັງ​ມີ​ຄວາມ​ບໍ່​​ແນ່​ນອນຢູ່, ນອກນັ້ນ, ມັນ​ໄດ້​ກວມ​ມາດ​ຕາ​ສ່ວນ​ອ່າວ​ໜ້ອຍ, ເສດ​ຖະ​ກິດ​ຂອງ​ພວກ​ເຮົາ​ມີ​ປະ​ລິ​ມານ​ຂ້ອນ​ຂ້າງ​ໃຫຍ່, ມີ​ຊ່ອງ​ຫວ່າງ​ການ​ປັບ​ຕົນ​ເອງ​ຂ້ອນ​ຂ້າງ​ສູງ, ສະ​ນັ້ນ, ຜົນ​ກະ​ທົບ​ຕໍ່​ລາ​ຄາ​ການ​ບໍ​ລິ​ໂພກ​ແລະ​ການ​ຜະ​ລິດ​ຂອງ​ພວກ​ເຮົາ​ນັ້ນ ຂ້າ​ພະ​ເຈົ້າ​ຮູ້​ສຶກວ່າ​ໜ້ອຍຫຼາຍ."
ຂ່າວ-ບົດທີ່ກ່ຽວຂ້ອງ
ຜູ້ດຳເນີນລາຍການ