ຕາມຂ່າວCRI: ຕອນຄ່ຳວັນທີ 10 ພະຈິກນີ້, ທ່ານສີຈິ້ນຜິງ, ປະທານປະເທດຈີນກັບທ່ານນາງເຜີງລີ້ຢວນ, ພັນລະຍາຂອງທ່ານໄດ້ຈັດງານລ້ຽງຢູ່ສູນລອຍນ້ຳແຫ່ງຊາດຈີນ " ສຸຍລີ້ຟ່າງ ", ເພື່ອຕ້ອນຮັບຜູ້ນຳ, ຜູ້ຕາງໜ້າພ້ອມພັນລະຍາຂອງອົງກອນເສດຖະກິດຕ່າງໆທີ່ເຂົ້າຮ່ວມກອງປະຊຸມບໍ່ເປັນທາງການຄັ້ງທີ 22 ຂອງຜູ້ນຳອົງການຮ່ວມມືເສດຖະກິດອາຊີປາຊິຟິກຫຼື APEC. ຜູ້ນຳປະເທດຕ່າງໆທີ່ກ່ຽວຂ້ອງພ້ອມດ້ວຍພັນລະຍາທີ່ມາເຂົ້າຮ່ວມກອງປະຊຸມສົນທະນາກ່ຽວກັບການເພີ່ມທະວີການພົວພັນຄູ່ຮ່ວມມືການເຊື່ອມຈອດກັນກໍ່ໄດ້ເຂົ້າຮ່ວມງານລ້ຽງຕາມຄຳເຊີນ.
ທ່ານສີຈິ້ນຜິງກ່າວຄຳປາໄສວ່າ, ຕາງໜ້າລັດຖະບານແລະປະຊາຊົນຈີນສະແດງຄວາມຍິນດີຕ້ອນຮັບຢ່າງອົບອຸ່ນຕໍ່ແຂກຜູ້ມີກຽດທັງຫຼາຍ. ທ່ານສີຈິ້ນຜິງກ່າວເນັ້ນວ່າ, ສາເຫດທີ່ພວກຂ້າພະເຈົ້າໄດ້ເລືອກ "ສຸຍລີ້ຟ່າງ" ເປັນບ່ອນຈັດງານລ້ຽງແມ່ນຍ້ອນວ່ານ້ຳມີຄວາມໝາຍສັນຍາລັກທີ່ສຳຄັນໃນວັດທະນະທຳຈີນ. ສະມາຊິກຕ່າງໆຂອງ APEC ໄດ້ຜູກສຳພັນທະໄມຕີຍ້ອນນ້ຳທະເລຂອງມະຫາສະໝຸດປາຊິຟິກ. ພວກຂ້າພະເຈົ້າມີໜ້າທີ່ຮັບຜິດຊອບເຮັດໃຫ້ປາຊີຟິກກາຍເປັນທະເລທີ່ມີຄວາມສະຫງົບແລະສັນຕິພາບ, ມີໄມຕີຈິດມິດຕະພາບແລະມີການຮ່ວມມືຢ່າງແທ້ຈິງ, ເປັນສັກຂີພິຍານແກ່ສັນຕິພາບ, ການພັດທະນາ, ຄວາມຈະເລີນ ຮຸ່ງເຮືອງແລະຄວາມກ້າວໜ້າຂອງເຂດອາຊີປາຊີຟິກ.
ພາຍຫຼັງຈັດງານລ້ຽງ, ທ່ານສີຈິ້ງຜິງພ້ອມດ້ວຍພັນລະຍາແລະແຂກຜູ້ມີກຽດທັງຫຼາຍໄດ້ຊົມການສະແດງສິລະປະແລະການສະແດງດອກໄມ້ໄຟທີ່ງົດງາມຮ່ວມກັນ.