ຄັ້ງທຳອິດ ແລະ ເປັນປະຫວັດສາດທີ່ແຂວງ ອຸດົມໄຊ ໄດ້ເປັນເຈົ້າພາບຈັດງານແຂ່ງຂັນກິລາແຫ່ງຊາດ ໂດຍໄດ້ເປີດການແຂ່ງຂັນໃນວັນທີ 13 ຫາ 21 ທັນວາ 2014, ຊຶ່ງມວນຊົນຈາກພາຍໃນ ແລະ ຕ່າງປະເທດ ກໍໄດ້ຫຼັ່ງໄຫຼ ເຂົ້າຮ່ວມງານເປີດການແຂ່ງຂັນ ແລະ ເຊຍກິລາ ເຮັດໃຫ້ບັນຍາກາດອຸດົມໄຊເກມ ມີສີສັນ ແລະ ຟົດຟື້ນ, ນອກຈາກເຈົ້າໜ້າທີ່ ແລະ ນັກກິລາລວມ 6 ພັນກວ່າຄົນທີ່ເຂົ້າຮ່ວມການແຂ່ງຂັນ, ຍັງມີນັກຂ່າວສືມວນຊົນທັງພາຍໃນ ແລະ ຕ່າງປະເທດຫຼາຍກວ່າ 200 ຄົນທີ່ເຂົ້າມາເກັບ ກຳຂ່າວ ແລະ ບັນຍາກາດຂອງການແຂ່ງຂັນ, ໃນນັ້ນ ແນ່ນອນກໍ່ຕ້ອງມີທີມງານນັກຂ່າວຈາກ ວິທະຍຸສາກົນແຫ່ງປະເທດຈີນ CRI ປະຈຳລາວ ເຂົ້າຮ່ວມເກັບກຳຂ່າວຢູ່ແລ້ວ. ສ່ວນພາບບັນຍາກາດ ບໍ່ວ່າຈະເປັນການປະດັບເອ້ຍ້ອງຕາມເສັ້ນທາງ ທີ່ເຕັ້ມໄປດ້ວຍປ້າຍຄຳຂວັນຂອງການແຂ່ງຂັນກິລາ, ທຸງຊາດ ທີ່ເຕັມສອງຟາກທາງ ທີ່ປະດັບໄດ້ຢ່າງສວຍງາມແລ້ວ, ສິ່ງທີ່ປະທັບໃຈແກ່ມຸມມອງຂອງ ທີມງານນັກຂ່າວ CRI ກໍ່ຄືຂ້າພະເຈົ້າເອງ ແມ່ນຄວາມມີນ້ຳໃຈ, ການເປັນເຈົ້າພາບທີ່ດີຂອງຊາວແຂວງອຸດົມໄຊ ແລະ ຄວາມກະຕືລືລົ້ນໃນການຕ້ອນຮັບແຂກບ້ານແຂກເມືອງ, ຄວາມສາມັກຄີຂອງປະຊາຊົນທີ່ພ້ອມກັນເປັນເຈົ້າພາບ, ຊຶ່ງເຫັນໄດ້ໃນມື້ວັນທີ 13 ທັນວານີ້, ກ່ອນພິທີເປີດການແຂ່ງຂັນ, ມີມວນຊົນເຂົ້າມາຊົມພິທີຢ່າງເປັນຈຳນວນຫຼວງຫຼາຍ, ນັບແຕ່ເວລາ 13 ໂມງກ່ອນເປີດພິທີຢ່າງເປັນທາງການ, ມວນຊົນກໍ່ໄດ້ເດີນທາງເຂົ້າສູ່ສະໜາມກິລາແຫ່ງຊາດ, ບໍ່ພໍເທົ່າໃດນາທີກໍເຫັນຜູ້ຄົນຄັບຄາໜາແໜ້ນ, ຈາກສະໜາມກິລາທີ່ໃຫຍ່ ແຕ່ກໍກັບກາຍເປັນຄັບແຄບໃນທັນຕາ, ຍ້ອນຄວາມກະຕືລືລົ້ນ ໃນຄັ້ງໜຶ່ງປະຫວັດສາດທີ່ແຂວງ ອຸດົມໄຊໄດ້ເປັນເຈົ້າພາບຈັດງານແຂ່ງຂັນກິລາແຫ່ງຊາດ ຄັ້ງທີ 10 ນີ້, ບາງຄົນກໍເກັບຖ່າຍພາບໄວ້ເປັນທີ່ລະນຶກ ຖຶງຈະເສຍເງິນແພງ ແຕ່ກໍພູມໃຈທີ່ໄດ້ຮ່ວມເປັນສ່ວນໜຶ່ງໃນງານດັ່ງກ່າວ, ບາງຄົນກໍເດີນທາງໄກມາຈາກຕ່າງແຂວງ ເປັນຕົ້ນແຂວງ ຜົ້ງສາລີ, ຫຼວງນ້ຳທາ ເພື່ອມາເຂົ້າຊົມ ແຕ່ກໍໜ້າເສຍດາຍ ທີ່ສະໜາມຄັບແຄບຮອງຮັບຈຳນວນຈຳກັດເດ ໃຫ້ຕ້ອງໄດ້ອົດທົນ ນັ່ງຊົມຢູ່ນອກສະໜາມ. ປະຊາຊົນ ທ່ານໜຶ່ງທີ່ມາຈາກແຂວງຜົ້ງສາລີ ເວົ້າຕໍ່ນັກຂ່າວ CRI ວ່າ: ຍ້ອນເປັນຄັ້ງປະຫວັດສາດ ຂອງແຂວງອຸດົມໄຊໄດ້ເປັນເຈົ້າພາບ ຈຶ່ງຢາກມາຊົມ, ແລະ ກໍຍ້ອນແຂວງຜົ້ງສາລີ ຢູ່ໃກ້ກັບອຸດົມໄຊ ຈຶ່ງຕັດສິນໃຈເດີນທາງມາ, ແຕ່ກໍໜ້າເສຍດາຍ, ໃນມື້ເປີດທີ່ບໍ່ສາມາດເຂົ້າເດີ່ນໄດ້ ຍ້ອນສະໜາມເຕັມໝົດ, ແຕ່ດົນກໍຫວັງວ່າ, ໃນມື້ປິດນີ້ ກໍຕັ້ງໃຈຈະມາຊົມໃໝ່ ແລະ ຫວັງວ່າ, ຈະໄດ້ເຂົ້າສູ່ສະໜາມຊົມພິທີປິດການແຂ່ງຂັນ, ພ້ອມທັງໄດ້ເກັບພາບບັນຍາກາດອັນສວຍງາມ ເພື່ອເປັນທີ່ລະລຶກ, ນີ້ກໍຢາກເປັນ ສິ່ງໜຶ່ງທີ່ທີມງານ ຈາກ ວິທະຍຸສາກົນແຫ່ງປະເທດຈີນ CRI ປະຈຳລາວ ທີ່ຮ່ວມເກັບກຳບັນຍາກກາດ ແລະ ກໍເຫັນວ່າ ແຂວງອຸດົມໄຊເປັນເຈົ້າພາບຈັດງານໄດ້ສົມສັກສີ ແລະ ເປັນເຈົ້າພາບທີ່ດີສົມຄວນ.
1 2