ໃນວັນທີ 13 ທັນວາ, ງານມະຫະກຳກິລາແຫ່ງຊາດຄັ້ງທີ 10 ໄດ້ເປີດສາກຂື້ນຢ່າງເປັນທາງການ ຢູ່ ແຂວງ ອຸດົມໄຊ, ໃນໄລຍະນີ້, ແຂວງ ອຸດົມໄຊ ແມ່ນຖືວ່າສະພາບ ອາກາດໜາວເຢັນຫຼາຍ, ໂດຍສະເພາະໃນຍາມເຊົ້າຈະມີເມກໝອກ, ສະເພາະຍາມແລງ, ຄ້ອຍຄ່ຳອາກາດ ກໍຍິ່ງໜາວເຢັນ, ເພາະມີທັງລົມພັດ ແລະ ມີນ້ຳໝອກປົກຄຸມພື້ນທີ່, ສະນັ້ນເຮັດໃຫ້ໃຜທີ່ມາແຂວງ ອຸດົມໄຊ ຄັ້ງນີ້, ຕ້ອງໄດ້ກະກຽມເສື້ອກັນໜາວ, ແລະ ຕ້ອງຮັກສາສຸຂະພາບໃຫ້ດີ ເພາະສະພາບອາກາດໜາວເຢັນ, ແນວໃດກໍດີ ໃນລະຫວ່າງທີ່ ນັກຂ່າວ CRI ໄດ້ມາເກັບກຳຂ່າວງານມະຫະກຳກິລາແຫ່ງຊາດຄັ້ງທີ 10 ກໍໄດ້ມີໂອກາດໄປທ່ອງທ່ຽວສະຖານທີ່ສຳຄັນທາງທຳມະຊາດ ແລະ ວັດວາອາຮາມທີ່ສັກສິດ ແລະ ເປັນທີ່ເຄົາລົບບູຊາຂອງຊາວແຂວງອຸດົມໄຊ ເປັນຕົ້ນແມ່ນ ຕາດນ້ຳກັດ ຕັ້ງຢູ່ມືອງໄຊ ແລະ ວັດພຣະເຈົ້າສິງຄຳ ຢູ່ເມືອງຫຼາແຂວງ ອຸດົມໄຊ. ໃນວັນທີ 19 ທັນວາ ນີ້, ນັກຂ່າວ CRI ຄື: ດວງພະຈັນ, ລັດຕະນະພອນ ແລະ ສຸກສົມປອງ ໄດ້ອອກເດີນທາງໄປວັດພຣະເຈົ້າສິງຄຳ ດ້ວຍລົດເກງສີດຳຄັນນ້ອຍ ຈາກເທດສະບານແຂວງ ອຸດົມໄຊ ມຸ່ງໜ້າສູ່ ເມືອງຫຼາ, ການເດີນທາງແມ່ນມີບັນຍາກາດດີ, ດວງພະຈັນ ຂັບລົດ ແລະ ເປີດເພັງຟັງເພື່ອຜ່ອນຄາຍອາລົມ ແລະ ເປັນການສ້າງບັນຍາກາດໃນການເດີນທາງ, ຂະນະ ທີ່ ລັດຕະນະພອນ ກໍໄດ້ໂອ້ລົມສົນທະນາ ແລະ ເວົ້າເຖີງທິວທັດທຳມະຊາດທີ່ສວຍງາມຂອງແຂວງ ອຸດົມໄຊ ເນື່ອງຈາກວ່າເປັນຄັ້ງທີສອງແລ້ວທີ່ຜູ້ກ່ຽວໄດ້ເດີນທາງມາແຂວງນີ້ ແລະ ກໍຍັງເຫັນວ່າມີຄວາມສວຍງາມ. ພໍລົດຂອງພວກເຮົາມາເຖີງເຂດເມືອງຫຼາ, ກໍໄດ້ມີເຈົ້າໜ້າທີ່ຕັ້ງຈຸດກວດກາ, ລົດນັກຂ່າວ cri, ພາຍຫຼັງເຈົ້າໜ້າທີ່ ສົ່ງສັນຍານໃຫ້ຈອດລົດ ເພື່ອກວດກາຄວາມເປັນລະບຽບຮຽບຮ້ອຍ, ຈາກນັ້ນ ກໍ່ອະນຸຍາດໃຫ້ລົດພວກເຮົາອອກເດີນທາງຕໍ່. ເວລາ ປະມານ 11 ໂມງ ພວກເຮົາກໍໄດ້ເດີນທາງມາເຖີງສະຖານທີ່ສັກສິດຂອງແຂວງ ອຸດົມໄຊ, ນັ້ນກໍຄື ວັດພຣະເຈົ້າສິງຄຳ ເຊິ່ງເປັນທີ່ເຄົາລົບບູຊາຂອງປະຊາຊົນແຂວງອຸດົມໄຊ ໄດ້ເວົ້າວ່າ: ຖ້າຫາກໃຜມາຂໍພອນ ນຳພຣະເຈົ້າສິງຄຳ ບໍ່ວ່າເລື່ອງໃດ ກໍຈະປະສົບຜົນສຳເລັດ, ສະນັ້ນ ຈຶ່ງເຮັດໃຫ້ມີທັງມວນຊົນຈາກ ຕ່າງແຂວງ ແລະ ພາຍໃນ ແຂວງຕ່າງກໍມາກາບໄຫວ້ ແລະ ຂໍພອນຕາມຄວາມປາດຖາໜາຂອງຕົນຕາມຄວາມເຊື່ອ. ຂະນະດຽວກັນ ນັກຂ່າວ cri ກໍໄດ້ມີການຂໍພອນກ່ອນອອກເດີນທາງກັບມາເທດສະບານແຂວງ ເພື່ອເກັບກຳຂ່າວກິລາທີ່ຍັງດຳເນີນການແຂ່ງຂັນ ຢູ່, ພໍເຖີງ ຈຸດດ່ານກວດກາ, ເຈົ້າໜ້າທີ່ ທ່ານ ໜຶ່ງໄດ້ກັວກມື ເອີ້ນບອກໃຫ້ລົດພວກເຮົາ ຢຸດຈອດ ເພື່ອກວດກາເອກະສານ, ຂະນະນັ້ນ ເຈົ້າໜ້າທີ່ກໍໄດ້ມີການໂອ້ລົມກັບນັກຂ່າວ ພວກເຮົາ ດ້ວຍຄວາມສະໜິດສະໜົມກັນ ເພາະມີເຈົ້າໜ້າທີ່ຈະລາຈອນ ທ່ານໜຶ່ງ ເວົ້າວ່າ: ເປັນແຟນມິດລາຍການ ຂອງວິທະຍຸ cri ແລະ ຟັງເປັນປະຈຳ, ໂອກາດນີ້, ນັກຂ່າວ cri ກໍໄດ້ມອບວາລະສານພາເພີນ ແລະ ຖ່າຍຮູບຮ່ວມກັນ ເພື່ອເປັນກຳລັງໃຈໃຫ້ກັບເຈົ້າໜ້າທີ່ ໃນການຮັກສາຄວາມສະຫງົບ ຖຶງວ່າຈະບໍ່ໄດ້ໄປຊົມກິລາ ແຕ່ກໍຕັ້ງໃຈປະຕິບັດງານ ເພື່ອປ້ອງກັນຄວາມສະຫງົບ ເຮັດໃຫ້ງານມະຫະກຳກິລາແຫ່ງາດຄັ້ງທີ 10 ມີຄວາມສະຫງົບ.
ເຈົ້າໜ້າທີ່ຕຳຫຼວດປະຈຳດ່ານ ເຂດເມືອງຫຼາ ເວົ້າສູ່ນັກຂ່າວ cri ຟັງວ່າ: ງານມະຫະກຳກິລາແຫ່ງຊາດຄັ້ງທີ 10 ແມ່ນມີຄວາມໝາຍສຳຄັນ, ເປັນຄັ້ງທຳອິດທີ່ ແຂວງ ອຸດົມໄຊ ໄດ້ເປັນເຈົ້າພາບ, ຊຶ່ງເຈົ້າໜ້າທີ່ພວກເຮົາກໍມີຄວາມພາກພູມໃຈ ທີ່ໄດ້ເຮັດໜ້າ ທີ່ປ້ອງກັນຄວາມສະຫງົບ ແລະ ເພື່ອຄວາມເປັນລະບຽບຮຽບຮ້ອຍ, ສະນັ້ນ ຈຶ່ງໄດ້ມີການ ວາງຈຸດກຳລັງ ກວດກາ ຢ່າງເຂັ້ມງວດ, ແນວໃດກໍດີ ນັບແຕ່ມື້ເປີດງານ ມາເຖີງປັດຈຸບັນ ກໍເຫັນວ່າມີຄວາມເປັນລະບຽບຮຽບຮ້ອຍດີ, ຊຶ່ງຫວັງວ່າ ງານກິລາແຫ່ງຊາດຄັ້ງທີ 10 ຈະປິດສາກລົງດ້ວຍຜົນສຳເລັດຢ່າງຈົບງາມ.
ຄະນະກຳມະການຮັກສາຄວາມສະຫງົບ ງານມະຫະກຳກິລາແຫ່ງຊາດຄັ້ງທີ 10 ໃຫ້ຮູ້ວ່າ: ງານກິລາແຫ່ງາດຄັ້ງທີ 10 ນີ້, ທາງເຈົ້າໜ້າທີ່ໄດ້ເພີ່ມທະວີຮັກສາຄວາມສະຫງົບ ໂດຍສະເພາະ ໃນເຂດສະໜາມກິລາ ແລະ ສະຖານທີ່ສຳຄັນຕ່າງໆ ເພື່ອປ້ອງກັນວາມສະຫງົບ, ຊຶ່ງໄດ້ລະດົມກຳລັງເຈົ້າໜ້າທີ່ ພາຍໃນແຂວງ ແລະ ຈາກສູນກາງ ມາຊ່ວຍໃນການຮັກສາຄວາມສະຫງົບ ຄວາມເປັນລະບຽບຮຽບຮ້ອຍຂອງສັງຄົມ ເພື່ອເຮັດໃຫ້ງານກິລາແຫ່ງຊາດຄັ້ງທີ 10ທີ່ແຂວງອຸດົມໄຊ ເປັນເຈົ້າພາບ ໄດ້ດຳເນີນໄປດ້ວຍຜົນສຳເລັດອັນຈົບງາມ.
