ວັນທີ 21 ທັນວາ 2014 ງານມະຫະກຳກິລາແຫ່ງຊາດຄັ້ງທີ 10 ໄດ້ປິດຢ່າງຍິ່ງໃຫຍ່.
ວັນທີ 21 ທັນວານີ້, ງານມະຫະກຳກິລາແຫ່ງຊາດຄັ້ງທີ 10 ໄດ້ອັດລົງດ້ວຍຜົນສຳເລັດ, ໂດຍການເຂົ້າຮ່ວມພິທີປິດຂອງທ່ານ ດຣ ພັນຄຳ ວິພາວັນ, ຮອງນາຍົກລັດຖະມົນຕີ, ລັດຖະມົນຕີວ່າ ການກະຊວງສຶກສາທິການ ແລະ ກິລາ, ພ້ອມດ້ວຍບັນດາຄະນະນຳແຂວງອຸດົມໄຊ ແລະ ທ່ານເຈົ້າ ແຂວງ ຊຽງຂວາງ, ເຈົ້າພາບຈັດງານແຂ່ງຂັນກິລາແຫ່ງຊາດຄັ້ງທີ 11.
ໃນພິທີປິດ, ທ່ານ ຄຳຫຼ້າ ລິ້ງນະສອນ ເຈົ້າແຂວງອຸດົມໄຊ ກ່າວສະຫຼຸບຜົນສຳເລັດການຈັດງານມະຫາກຳກິລາແຫ່ງຊາດຄັ້ງທີ 10 ວ່າ: ງານມະຫະກຳກິລາແຫ່ງຊາດຄັ້ງທີ 10 ເລີ່ມແຂ່ງຂັນມາແຕ່ວັນທີ 4 ທັນວາ, ແລະ ພິທີເປີດງານຢ່າງເປັນທາງການໃນວັນທີ 13 ທັນວາ 2014, ໃນຄ່ຳຄືນມື້ນີ້ ຈະໄດ້ອັດລົງຢ່າງເປັນທາງການດ້ວຍຜົນສຳເລັດອັນຈົບງາມ, ການຈັດງານແຂ່ງຂັນຄັ້ງນີ້ ເປັນຄວາມພາກພູມໃຈ ແລະ ເປັນຄັ້ງປະຫວັດສາດທີ່ແຂວງອຸດົມໄຊ ໄດ້ເປັນເຈົ້າພາບກິລາທີ່ໃຫຍ່ ລະດັບຊາດ, ຊຶ່ງມີການແຂ່ງຂັນ 25 ປະເພດກິລາ, ຊິງຫຼຽນທັງໝົດ 1.148 ຫຼຽນ, ມີ 25 ພາກສ່ວນເຂົ້າຮ່ວມ, ຊຶ່ງມາຈາກ 7 ກະຊວງ, ນະຄອນຫຼວງວຽງຈັນ ແລະ 17 ແຂວງໃນທົ່ວປະເທດ. ການແຂ່ງຂັນຄັ້ງນີ້, ອັນດັບໜຶ່ງ ໄດ້ແກ່ ກະຊວງປ້ອງກັນປະເທດ, ມີ 61 ຫຼຽນຄຳ, 29 ຫຼຽນເງີນ ແລະ 37 ຫຼຽນທອງ, ລວມ 127 ຫຼຽນ, ທີສອງແມ່ນ ນະຄອນຫຼວງວຽງຈັນ 55 ຫຼຽນຄຳ, 31 ຫຼຽນເງີນ, 49 ຫຼຽນທອງ ລວມ 135 ຫຼຽນ, ທີສາມ ແມ່ນກະຊວງປ້ອງກັນຄວາມສະຫງົບ 42 ຫຼຽນຄຳ, 43 ຫຼຽນເງີນ, 51ຫຼຽນທອງ ລວມ 135 ຫຼຽນ. ເຈົ້າພາບຂອງງານຄືແຂວງອຸດົມໄຊ ຢູ່ໃນ ອັນດັບ 4 ມີ 33 ຫຼຽນຄຳ, 24 ຫຼຽນເງີນ ແລະ 53 ຫຼຽນທອງ ລວມ 110 ຫຼຽນ, ຊຶ່ງເປັນຜົນງານທີ່ດີທີ່ສຸດ ແລະ ເກີນເປົ້າໝາຍທີ່ແຂວງ ຄາດໄວ້.
ພາຍຫຼັງ ທ່ານ ຄຳຫຼ້າ ລິ້ງນະສອນ ກ່າວສະຫຼຸບຜົນສຳເລັດການຈັດງານມະຫາກຳກິລາແຫ່ງຊາດຄັ້ງທີ 10 , ກໍໄດ້ມີພິທີສົ່ງມອບທຸງກິລາແຫ່ງຊາດ ໃຫ້ກັບ ທ່ານ ດຣ ສົມກົດ ມັງໜໍ່ເມກ ເຈົ້າແຂວງ ຊຽງຂວາງ ທີ່ໄດ້ເປັນເຈົ້າພາບຈັດງານແຂ່ງຂັນມະຫາກຳກິລາແຫ່ງຊາດຄັ້ງທີ 11 ຢູ່ ແຂວງຊຽງຂວາງ ໃນປີ 2017 , ແລະ ມີການສະແດງສິລະປະ ກ່ອນຈະມີການປິດງານມະຫາກຳກິລາແຫ່ງຊາດຄັ້ງທີ 10 ຢ່າງຍິ່ງໃຫຍ່ ແລະ ສ້າງຄວາມປະທັບໃຈໃຫ້ກັບມວນຊົນ.