ຫວ່າງມໍ່ໆມານີ້, ອາເມລິກາມີການກະທຳຢ່າງບໍ່ຢຸດຢັ້ງໃນໂລກຄື: ສົ່ງກຳປັ່ນບັນທຸກເຮືອບິນຊື່ "Carl Vinson" ໄປລາດຕະເວນຢູ່ທະເລຈີນໃຕ້, ແລະອີກສອງລຳກໍໄດ້ຈັດວາງຢູ່ອາຊີ; ສົ່ງຖ້ານຍິງຊີປະນາວຸດຂອງລະບົບຕ້ານຊີປະນາວຸດ "ທັດ" ເຂົ້າປະຈຳ ສ.ເກົາຫຼີ; ການຊ້ອມຮົບປະສົມອາເມລິກາແລະສ ເກົາຫຼີເຮັດໃຫ້ສະຖານະການຢູ່ແຫຼມເກົາຫຼີເຄັ່ງຕຶງຂຶ້ນ; ໄດ້ປະກາດຕົວເລກສະຖິຕິຫຼ້າສຸດວ່າ, ໃນການຂາດດຸນການຄ້າປີ 2016 ມີ 47% ແມ່ນມາຈາກຈີນ, ສົ່ງຜົນເຮັດໃຫ້ອັດຕາການປະກອບອາຊີບຫຼຸດລົງແລະອື່ນໆ, ການກະທຳເຫຼົ່ານີ້ຂອງອາເມລິກາລ້ວນແຕ່ແມ່ນແນ່ໃສ່ເປົ້າໝາຍດຽວກໍຄື: ປະເທດຈີນ!
ໃນຫຼັກແພດແຜນຈີນ, ຮ່າງກາຍແລະຄວາມຄິດຂອງຄົນແມ່ນແຍກອອກກັນບໍ່ໄດ້, ບາງກໍລະນີເບິ່ງຄືວ່າຮ່າງກາຍເກີດບັນຫາແຕ່ຄວາມຈິງແລ້ວແມ່ນຄວາມຄິດໄດ້ເກີດບັນຫາ, ແລະກໍລະນີນີ້ກໍເໝາະໃຊ້ສຳລັບປະເທດໃດໜຶ່ງ, ອາເມລິກາຈົງໃຈໂຄສະນາແລະປ່າວຂ່າວກ່ຽວກັບປະເທດຈີນເປັນການໃຫຍ່ແລະຕຳໜິຈີນຈາກດ້ານການເມືອງ, ເສດຖະກິດແລະອື່ນໆໃນຫວ່າງມໍ່ໆມານີ້, ກໍຍ້ອນມີຄວາມຄິດທີ່ຜິດພາດໃນສີ່ດ້ານຄື:
ໜຶ່ງ: ຖືໂຕ, ໃນສາຍຕາບໍ່ມີໃຜເລີຍ
ອາເມລະກາເຫັນວ່າ, ຄຽງຄູ່ກັບສົງຄາມເຢັນໄດ້ສິ້ນສຸດລົງ, ເສດຖະກິດຕະຫຼາດແລະລະບອບປະຊາທິປະໄຕເສລີຂອງຕາເວັນຕົກໄດ້ຊະນະໃນທີ່ສຸດ. ແຕ່ວ່າ, ຄຽງຄູ່ກັບຈີນພັດທະນາແລະກາຍເປັນກຸ່ມເສດຖະກິດໃຫຍ່ອັນດັບສອງຂອງໂລກ, "ຮູບແບບຈີນ" ກໍໄດ້ກາຍເປັນຈຸດສົນໃຈຂອງໂລກ, ຂະນະທີ່ໃນຊຸມປີມໍ່ໆມານີ້, ຫຼາຍຕົວຢ່າງປະຊາທິປະໄຕທີ່ອາເມລິກາສ້າງຂຶ້ນຢູ່ຕາເວັນອອກກາງແລະ ເອີຣົບຕາເວັນອອກພັດເກີດບັນຫາ ເພາະບໍ່ສອດຄ່ອງກັບສະພາບຕົວຈິງທ້ອງຖິ່ນ ເຊິ່ງໄດ້ສະແດງໃຫ້ເຫັນເຖິງອາເມລິກາທີ່ຖືໂຕ ແລະ ມັກບັງຄັບໃຫ້ປະເທດອື່ນຮັບເອົາຄ່ານິຍົມຂອງຕົນນັ້ນກໍາລັງຊຸດໂຊມລົງໂດຍບໍ່ສາມາດສະກັດກັ້ນໄດ້.
ສອງ: ອິດສາປະເທດອື່ນທີ່ພັດທະນາເຕີບໃຫຍ່ຂຶ້ນ
ກ່ອນດຳເນີນການປະຕິຮູບແລະເປີດປະຕູສູ່ພາຍນອກ, ຍ້ອນເສດຖະກິດຈີນຫຼ້າຫຼັງ, ປະເທດຕາເວັນຕົກທີ່ມີອາເມລິກາເປັນຜູ້ນຳລ້ວນແຕ່ບໍ່ຢາກໃຫ້ຈີນເຂົ້າຮ່ວມໃນຂົງເຂດຕ່າງໆ,ແຕ່ຜົນສຳເລັດທີ່ຈີນໄດ້ຮັບໃນການປະຕິຮູບແລະເປີດປະຕູສູ່
ພາຍນອກຫຼາຍປີມານີ້ເຮັດໃຫ້ທົ່ວໂລກອັດສະຈັນ, ສະນັ້ນ ຈິ່ງເຮັດໃຫ້ອາເມລິກາຮູ້ສຶກບໍ່ສະບາຍໃຈ.
ສາມ: ຖິ້ມຄວາມຮັບຜິດຊອບໃຫ້ຜູ້ອື່ນ, ຄວາມຜິດແມ່ນຂອງຜູ້ອື່ນໝົດ
ອາເມລິກາຖືຕົວເອງເປັນຜູ້ນຳຂອງໂລກມາໂດຍຕະຫຼອດ, ແຕ່ເມື່ອປະສົບພົບພໍ້ຄວາມຫຍຸ້ງຍາກ, ກໍຈະຖິ້ມຄວາມຮັບຜິດຊອບໃຫ້ຜູ້ອື່ນ. ເປັນຕົ້ນວ່າ ບັນຫານິວເຄຼຍແຫຼມເກົາຫຼີ ແລະ ການເສຍປຽບດຸນການຄ້າກັບຈີນ, ອາເມລິກາເຫັນວ່າ ແມ່ນຄວາມຮັບຜິດຊອບຂອງຈີນໝົດ. ແຕ່ຄວາມຈິງແລ້ວ, ຈຸດສຳຄັນຂອງການແກ້ໄຂວິກິດການນິວເຄຼຍແຫຼມເກົາຫຼີຢ່າງເຖິງຖອງແມ່ນຢູ່ນຳທ່າທີຂອງອາເມລິກາ, ນີ້ແມ່ນຄວາມຮັບຜິດຊອບທີ່ຖິ້ມໃຫ້ຜູ້ອື່ນບໍ່ໄດ້ຢ່າງແນ່ນອນ. ຂະນະທີ່ບົດລາຍງານທີ່ຄະນະກຳມະການການຄ້າແຫ່ງຊາດອາເມລິກາຈີນປະກາດນັ້ນສະແດງໃຫ້ເຫັນວ່າ, ແຕ່ປີ 2006 ຫາປີ 2015, ອາເມລະກາໄດ້ສົ່ງອອກສິນຄ້າຕໍ່ຈີນເພີ່ມຂຶ້ນ 115%, ລື່ນກາຍ 10 ຄູ່ການຄ້າຕົ້ນຕໍອື່ນໆ. ຄວາມຈິງແລ້ວ, ຈີນແມ່ນປະເທດທີ່ສຳຄັນທີ່ໄດ້ປະກອບສ່ວນເຂົ້າໃນການເຕີບໂຕຂອງເສດຖະກິດອາເມລິກາ.
ສີ່: "ຂຸມອຸບາຍທະຊິດິດສ໌"
ອາເມລິກາໄດ້ນຳໃຊ້ທິດສະດີ "ຂຸມອຸບາຍທະຊິດິດສ໌" ໃນ 2500 ປີກ່ອນມາບັນຍາຍການພົວພັນລະຫວ່າງຈີນ-ອາເມລິກາທີ່ເປັນການພົວພັນລະຫວ່າງສອງຝ່າຍທີ່ສຳຄັນທີ່ສຸດໃນສະຕະຫວັດທີ 21 ໂດຍເຫັນວ່າ, ຖ້າບໍ່ສະກັດ ກັ້ນທັນທີ, ຖານະຂອງຕົນທີ່ເປັນຜູ້ນຳຂອງໂລກກໍຈະຖືກປະເທດຈີນເຂົ້າແທນໃນອະນາຄົດ. ແຕ່ຄວາມຈິງແລ້ວ, ຈີນໄດ້ເດີນຕາມເສັ້ນທາງໃໝ່ທີ່ພັດທະນາໂດຍສັນຕິ ເຊິ່ງເປັນເສັ້ນທາງທີ່ຕ່າງກັບປະເທດໃຫຍ່ທີ່ເຕີບໂຕໃຫຍ່ຂຶ້ນໃນປະ ຫວັດສາດ. ເດືອນກັນຍາປີ 2015, ທ່ານສີຈີ້ນຜີງ ປະທານປະເທດຈີນໄດ້ຢ້ຽມຢາມອາເມລິກາແລະກ່າວວ່າ: "ໃນໂລກນີ້ບໍ່ມີ 'ຂຸມອຸບາຍທະຊິດິດສ໌', ແຕ່ຖ້າວ່າຢູ່ລະຫວ່າງປະເທດໃຫຍ່ວິນິດໄສຍຸດທະສາດບໍ່ຖືກຕ້ອງວ, ກໍ່ຈະເປັນການສ້າງ 'ຂຸມອຸບາຍທະຊິດິດສ໌'ໃຫ້ແກ່ຕົວເອງ."
ໃນຊູ່ມື້ນີ້ທີ່ເສດຖະ ກິດຈີນ-ອາເມລິກາມີຄວາມອີງອາໄສກັນຢ່າງສູງ ແລະ ມີຜົນປະໂຫຍດຮ່ວມຢ່າງຫຼວງຫຼາຍ, ມາດຕະການຕ່າງໆຂອງອາເມລິກາທີ່ໃຊ້ເພື່ອສະກັດກັ້ນຈີນນັ້ນ ຄວາມຈິງຈະເປັນການກະທຳທີ່ສ້າງຜົນເສຍຫາຍໃຫ້ແກ່ຕົວ ເອງເຊັ່ນດຽວກັນໃນທີ່ສຸດ.