ວັນທີ 16 ກັນຍານີ້, ງານວາງສະແດງສິນຄ້າຈີນ-ອາຊຽນຄັ້ງທີ 11 ແລະກອງປະຊຸມສຸດຍອດການຄ້າແລະການລົງທຶນຈີນ-ອາຊຽນຄັ້ງທີ 11 ທີ່ຈັດຮ່ວມກັນໂດຍຈີນແລະ 10 ປະເທດອາຊຽນ ໄດ້ໄຂຂຶ້ນຢູ່ນະຄອນນານນິງ, ເຂດປົກຄອງຕົນເອງເຜົ່າຈວ້ງກວາງຊີຂອງຈີນ. ທ່ານລີຊຽນລຸງ, ນາຍົກລັດຖະມົນຕີສິງກະໂປ ທີ່ເປັນປະເທດກິດຕິມະສັກຂອງງານວາງສະແດງຄັ້ງນີ້ ໄດ້ກ່າວຄໍາປາໄສໃນພິທີໄຂງານຄັ້ງນີ້ວ່າ, ສາເຫດຕົ້ນຕໍຂອງການເຕີບໂຕຂອງອາຊີແມ່ນຍ້ອນການເຕີບໂຕຂອງເສດຖະກິດຂອງຈີນ ແລະການເຊື່ອມໂຍງເຂົ້າກັນຂອງພາກພື້ນຈີນ-ອາຊຽນ.
ທ່ານລີຊຽນລຸງກ່າວວ່າ, ພາຍຫຼັງໄດ້ເຊັນສັນຍາວ່າດ້ວຍການຄ້າສິນຄ້າຂອງເຂດການຄ້າເສລີຈີນ-ອາຊຽນໃນປີ 2005 ເປັນຕົ້ນມາ, ການຄ້າສອງຝ່າຍໄດ້ເພີ່ມຂຶ້ນຫຼາຍກວ່າ 3 ເທົ່າ, ອາຊຽນກໍໄດ້ກາຍເປັນຄູ່ການຄ້າໃຫຍ່ອັນດັບ 3 ຂອງຈີນເຊັ່ນກັນ, ສ່ວນການພັດທະນາຂອງອາຊີກໍໄດ້ສ້າງຜົນປະໂຫຍດໃຫ້ແກ່ປະຊາຊົນຈໍານວນຫຼວງຫຼາຍຂອງອາຊຽນແລະຈີນ ໂດຍໄດ້ເຮັດໃຫ້ມີລາຍໄດ້ເພີ່ມຂຶ້ນ, ລະດັບຊີວິດການເປັນຢູ່ຂອງປະຊາຊົນໄດ້ຮັບການປັບປຸງໃຫ້ດີຂຶ້ນ. ທ່ານລີຊຽນລຸງກ່າວຕື່ມວ່າ, ໃນ 10 ປີຫຼືເວລາຫຼາຍກວ່າ 10 ປີຕໍ່ໜ້າ, ຈີນຈະສືບຕໍ່ຮັກສາທ່າອ່ຽງການເຕີບໂຕທີ່ແຂງແຮງ, ນີ້ມີຜົນສະທ້ອນອັນຕັ້ງໜ້າຕໍ່ການພັດທະນາຂອງພາກພື້ນພວກເຮົາ.