ຈີນເຜີຍແຜ່ປຶ້ມປົກຂາວ "ການແກ້ໄຂຫຼຸດຜ່ອນຄວາມທຸກຍາກແລະຄວາມກ້າວໜ້າດ້ານມະນຸດສະທຳຂອງຈີນ"
2016-10-17 15:23:58 cri
ວັນທີ 17 ຕຸລານີ້, ຫ້ອງການຖະແຫຼງຂ່າວຂອງລັດຖະບານຈີນໄດ້ເຜີຍແຜ່ປຶ້ມປົກຂາວ "ການແກ້ໄຂຫຼຸດຜ່ອນຄວາມທຸກຍາກແລະຄວາມກ້າວໜ້າດ້ານມະນຸດສະທຳຂອງຈີນ".
ປຶ້ມປົກຂາວລະບຸວ່າ: "ບົດລາຍງານເປົ້າໝາຍພັດທະນາສະຫັດສະຫວັດປີ 2015" ຂອງອົງການສະຫະປະຊາຊາດຫຼື UN ສະແດງໃຫ້ເຫັນວ່າ, ປະຊາຊົນທຸກຍາກແລະດ້ອຍໂອກາດຂອງຈີນໄດ້ຫຼຸດລົງເຖິງ 4,2% ໃນປີ 2014 ຈາກປີ 1990 ທີ່ມີເຖິງ 61% ໂດຍຜົນສຳເລັດດັ່ງກ່າວໄດ້ປະກອບສ່ວນເຂົ້າໃນການຫຼຸດຜ່ອນຄວາມທຸກຍາກຂອງສາກົນຫຼາຍກວ່າ 70%. ຂະນະດຽວກັນຈີນກາຍເປັນປະເທດທີ່ຫຼຸດຜ່ອນຄົນທຸກຍາກຫຼາຍທີ່ສຸດໃນໂລກແລະເປັນປະເທດທີ່ສຳເລັດເປົ້າໝາຍພັດທະນາສະຫັດສະຫວັດຂອງອົງການ UN ໄວກ່ອນໝູ່ໂດຍໄດ້ປະກອບສ່ວນສຳຄັນໃນພາລະກິດຫຼຸດຜ່ອນຄວາມທຸກຍາກຂອງສາກົນແລະກໍໄດ້ຮັບການຊົມເຊີຍຢ່າງກວ້າງຂວາງຈາກປະຊາຄົມໂລກ. ຜົນສຳເລັດດັ່ງກ່າວໄດ້ບັນທຶກໄວ້ໃນປຶ້ມປະຫວັດສາດການພັດທະນາສັງຄົມມະນຸດແລະກໍສາມາດສ່ອງແສງໃຫ້ເຫັນເຖິງຄວາມປິຊາສາມາດໃນການນຳພາຂອງພັກກອມມູນິດຈີນກໍຄືລະບອບສັງຄົມນິຍົມສີສັນພິເສດຂອງຈີນ.
ປຶ້ມປົກຂາວລະບຸວ່າ: ຂະນະທີ່ສຸມໃສ່ການຫຼຸດຜ່ອນຄວາມທຸກຍາກຂອງປະເທດຕົນ, ຈີນຍັງສະໜັບສະໜູນແລະຊ່ວຍເຫຼືອບັນດາປະເທດກຳລັງພັດທະນາຫຼຸດຜ່ອນຄວາມທຸກຍາກຢ່າງຕັ້ງໜ້າມາໂດຍຕະຫຼອດ, ໂດຍໃນໄລຍະ 60 ກວ່າປີຜ່ານມາ, ຈີນໄດ້ສະໜອງທຶນຊ່ວຍເຫຼືອເກືອບ 400 ຕື້ຢວນໃຫ້ແກ່ 166 ປະເທດແລະອົງການຈັດຕັ້ງສາກົນ.