ສື່ມວນຊົນຫຼາຍປະເທດຕັ້ງໜ້າຕີລາຄາຜົນງານການນຳພາຂອງພັກກອມມູນິດຈີນ ແລະໃຫ້ຄວາມສຳຄັນຕໍ່ກອງປະຊຸມໃຫຍ່ຜູ້ແທນທົ່ວປະເທດຂອງພັກກອມມູນິດຈີນຄັ້ງທີ 19 ທີ່ຈະຈັດຂຶ້ນ
2017-10-15 14:48:17 cri
ກອງປະຊຸມໃຫຍ່ຜູ້ແທນທົ່ວປະເທດຂອງພັກກອມມູນິດຈີນຄັ້ງທີ 19 ທີ່ໃກ້ຈະຈັດຂຶ້ນໄດ້ດຶງດູດສາຍຕາທົ່ວໂລກ. ໃນຫວ່າງມໍ່ໆນີ້, ສື່ມວນຊົນຂອງຫຼາຍປະເທດ ເຊັ່ນສິງກະໂປ, ເຢຍລະມັນ,ແລະອິນເດຍເປັນຕົ້ນໄດ້ພາກັນປະກາດບົດວິຈານ, ຕັ້ງໜ້າຕີລາຄາຜົນງານການພັດທະນາທີ່ຈີນໄດ້ຮັບໃນຂົງເຂດຕ່າງໆ ພາຍໃຕ້ການນຳພາຂອງພັກກອມມູນິດຈີນໃນ 5 ປີທີ່ຜ່ານມາ, ໂດຍເຫັນວ່າ ກອງປະຊຸມໃຫຍ່ຜູ້ແທນທົ່ວປະເທດຂອງພັກກອມມຸນິດຈີນຄັ້ງທີ 19 ຈະມີຜົນສະທ້ອນທີ່ສຳຄັນຕໍ່ຈີນແລະຕໍ່ທົ່ວໂລກ.
ໜັງສືພິມ the Straits Times ຂອງສິງກະໂປພິມບົດຄວາມຊີ້ອອກວ່າ, ພັກກອມມູນິດຈີນຈະປຶກສາຫາລືກັນກ່ຽວກັບການສືບຕໍ່ຊຸກຍູ້ການສ້າງສາຈີນເປັນສັງຄົມອີ່ມໜຳສຳລານຢ່າງຮອບດ້ານໃນກອງປະຊຸມໃຫຍ່ຜູ້ແທນທົ່ວປະເທດຄັ້ງທີ 19, ຈີນໄດ້ກາຍເປັນແບບຢ່າງໃນດ້ານການບຳບັດຄວາມທຸກຍາກໃນທົ່ວໂລກ, ການນຳຂອງພັກກອມມູນິດຈີນຍັງກຳລັງສຸມໃສ່ການແຂຂໍ້ຍາກໃນການບຳບັດຄວາມທຸກຍາກຢູ່.
ຫວ່າງມໍ່ໆນີ້ ເວັບໄຊຂອງໜັງສືພິມເຕເວີດເຢຍລະມັນໄດ້ປະກາດບົດຄວາມໂດຍກ່າວວ່າ, ປັດຈຸບັນ ເສດຖະກິດຈີນຈະເລີນຮຸ່ງເຮືອງຫຼາຍ, ລາຍໄດ້ຂອງປະຊາຊົນກໍເພີ່ມສູງຂຶ້ນ, ປະຊາຊົນມີຄວາມພໍໃຈຢ່າງສູງຕໍ່ພັກກຳອຳນາດ. ການນຳ ຂອງຈີນຫວັງໃຫ້ຈີນກາຍເປັນປະເທດທີ່ເຂັ້ມແຂງໃນໂລກ. ໃນກອງປະຊຸມໃຫຍ່ຜູ້ແທນທົ່ວປະເທດຂອງພັກກອມມູນິດຈີນຄັ້ງທີ 19 ທີ່ໃກ້ຈະໄຂຂຶ້ນ, ພັກກອມມຸນິດຈີນຈະຊີ້ໃຫ້ເຫັນທິດທາງການພັດທະນາໃນອະນາຄົດຢ່າງຈະແຈ້ງ.
ໜັງສືພິມ ເຕຮິນດູ ພິມບົດຄວາມໂດຍຂຽນວ່າ, ໃນ 5 ປີຜ່ານມານີ້, ຈີນໄດ້ດຳເນີນການປະຕິຮູບທີ່ສຳຄັນຢ່າງຫຼວງຫຼາຍ, ການຕ້ານການສໍ້ລາດບັງຫຼວງ, ລົງເລິກການປະຕິຮູບດ້ານການປ້ອງກັນປະເທດແລະກອງທັບ, ເພີ່ມທະວີແລະປັບປຸງການນຳພາຂອງພັກຕໍ່ວຽກງານຖະແຫຼງຂ່າວ ສື່ມວນຊົນ ແລະວຽກງານອື່ນໆ ລ້ວນແຕ່ໄດ້ຮັບຜົນສຳເລັດອັນໃຫຍ່.
