ທ່ານຫຼີເຄີ້ສຽງ ຈະເຂົ້າຮ່ວມກອງປະຊຸມການຮ່ວມມືອາຊີຕາເວັນອອກແລະຢ້ຽມຢາມຟີລິບປິນ
2017-11-07 17:34:24 cri
ໂດຍຕອບສະໜອງຕາມຄຳເຊີນຂອງທ່ານ ໂຣດຣີໂກ ດູເຕີເຕ ປະທານາທິບໍດີຟີລິບປິນເຊິ່ງເປັນປະເທດປະທານໝູນວຽນອາຊຽນ, ທ່ານຫຼີເຄີ້ສຽງ ນາຍົກລັດຖະມົນຕີຈີນຈະເດີນທາງໄປນະຄອນຫຼວງມະນີລາ ປະເທດດັ່ງກ່າວແຕ່ວັນທີ 12 ຫາວັນທີ 16 ພະຈິກນີ້, ເພື່ອເຂົ້າຮ່ວມກອງປະຊຸມການຮ່ວມມືຜູ້ນຳອາຊີຕາເວັນອອກຕ່າງໆແລະຢ້ຽມຢາມຟີລິບປິນຢ່າງເປັນທາງການ.
ກະຊວງການຕ່າງປະເທດຈີນໄດ້ຖະແຫຼງຂ່າວໃນວັນທີ 6 ພະຈິກນີ້ໂດຍແຈ້ງວ່າລະການຢ້ຽມຢາມໂດຍທ່ານເສິນສ້ຽວຕຸ່ງ ຜູ້ຊ່ວຍລັດຖະມົນຕີກະຊວງການຕ່າງປະເທດຈີນກ່າວວ່າ, ທ່ານຫຼີເຄີ້ສຽງ ຈະຊີ້ແຈ້ງນະໂຍບາຍຂອງຈີນກ່ຽວກັບການຮ່ວມມືອາຊີຕາເວັນອອກ, ແລະຈະສະເໜີຂໍ້ລິເລີ່ມໃໝ່ປະມານ 30 ຂໍ້ກ່ຽວກັບການລົງເລິກການຮ່ວມມືທີ່ຕິດແທດຕົວຈິງ, ເນື້ອໃນກ່ຽວພັນກັບຫຼາຍຂົງເຂດເຊັ່ນການເຊື່ອມຈອດກັນ, ຄວາມປອດໄພດ້ານສະບຽງອາຫານ, ການຫຼຸດຜ່ອນຄວາມທຸກຍາກ, ການທ່ອງທ່ຽວ, ການຕ້ານການສໍ້ລາດບັງຫຼວງແລະອື່ນໆ, ເພື່ອຊຸກຍູ້ສາຍພົວພັນລະຫວ່າງຈີນກັບອາຊຽນກ້າວຂຶ້ນສູ່ລະດັບໃໝ່.
ຂ່າວແຈ້ງວ່າ, ຈີນແລະຟີລິບປີນກຽມຈະອອກຖະແຫຼງການຮ່ວມໃນໄລຍະຢ້ຽມຢາມ, ເພື່ອສ່ອງແສງໃຫ້ເຫັນເຖິງຄວາມເປັນເອກະພາບແລະຜົນສຳເລັດຂອງການຢ້ຽມຢາມຄັ້ງນີ້, ແລະຫວັງຈະບັນລຸຜົນງານສຳຄັນຕ່າງໆໃນດ້ານການກໍ່ສ້າງພື້ນຖານໂຄງລ່າງ, ການລົງທຶນເສດຖະກິດການຄ້າ, ວັດທະນະທຳສັງຄົມແລະອື່ນໆ, ຂະນະດຽວກັນຈະເຊັນສັນຍາຮ່ວມມືຕື່ມອີກ.
