 |
 |
 |
 |
|
|
|
|
ສະພາຄວາມໝັ້ນຄົງອົງການສະຫະປະຊາຊາດ ໄດ້ອອກຖະແຫຼງການໃນວັນທີ 15 ເມສານີ້ ໂດຍປະນາມຢ່າງຮຸນແຮງຕໍ່ກຸ່ມປະກອບອາວຸດທີ່ກໍ່ການຫຼອນໂຈມຕີຄະນະຮັກສາສັນຕິພາບຂອງອົງການສະຫະປະຊາຊາດປະຈຳມາລີ ຫຼື MINUSMA ຢູ່ເມືອງຕິມບຸກຕູ ປະເທດມາລີ ໃນວັນທີ 14 ເມສານີ້.
ຂ່າວລາຍງານວ່າ: ເຫດການຫຼອນໂຈມຕີ ໄດ້ເຮັດໃຫ້ທະຫານຮັກສາສັນຕິພາບຂອງອົງການສະຫະປະຊາຊາດຈາກປະເທດບູກີນາຟາໂຊ 1 ຄົນເສຍຊີວິດ ນອກນີ້ຍັງມີສິບກວ່າຄົນບາດເຈັບ.
ຖະແຫຼງການລະບຸວ່າ: ສະພາຄວາມໝັ້ນຄົງສະແດງຄວາມເຫັນອົກເຫັນໃຈຢ່າງສຸດຊຶ້ງທີ່ສຸດມາຍັງຄອບຄົວຂອງຜູ້ປະສົບເຄາະຮ້າຍ ແລະ ລັດຖະບານບູກີນາຟາໂຊ ພ້ອມດ້ວຍຄະນະຮັກສາສັນຕິພາບປະຈຳມາລີ, ອວຍພອນໃຫ້ຜູ້ໄດ້ຮັບບາດເຈັບຈົ່ງຟື້ນຟູສຸຂະພາບໂດຍໄວ ທັງສະແດງຄວາມເຄົາລົບຕໍ່ເຈົ້າໜ້າທີ່ຮັກສາສັນຕິພາບທີ່ປະຕິບັດໜ້າທີ່ສ່ຽງຕໍ່ຄວາມອັນຕະລາຍເຖິງຊີວິດຕົນຢູ່ມາລີ.
ຖະແຫຼງການລະບຸຕື່ມວ່າ: ປະເທດສະມາຊິກສະພາຄວາມໝັ້ນຄົງອົງການສະຫະປະຊາຊາດຮຽກຮ້ອງໃຫ້ລັດຖະບານມາລີດຳເນີນການສືບສວນ-ສອບສວນຕໍ່ເຫດການຫຼອນໂຈມຕີໂດຍໄວ ເພື່ອປະຕິບັດກົດໝາຍຕໍ່ຜູ້ກໍ່ເຫດ.
 |
 |
 |