ລົດບໍລິການນັກທ່ອງທ່ຽວຈີນເກີດອຸບັດເຫດຮ້າຍແຮງຢູ່ ສປປ ເກົາຫຼີ
2018-04-24 11:21:35 cri
ເວັບໄຊກະຊວງການຕ່າງປະເທດຈີນໄດ້ໃຫ້ຮູ້ໃນວັນທີ 23 ເມສານີ້ວ່າ, ຕອນຄ່ຳວັນທີ 22 ເມສານີ້, ຢູ່ແຂວງຮວງໄຮເໜືອຂອງ ສປປ ເກົາຫຼີ ໄດ້ເກີດອຸບັດເຫດທາງລົດທີ່ຮ້າຍແຮງລາຍໜຶ່ງ ເປັນເຫດໃຫ້ນັກທ່ອງທ່ຽວຈີນໄດ້ຮັບບາດເຈັບແລະເສຍຊີວິດ. ທ່ານ ລູ້ຄ່າງ ໂຄສົກກະຊວງການຕ່າງປະເທດຈີນກ່າວໃນການຖະແຫຼງຂ່າວວ່າ, ອຸບັດເຫດດັ່ງກ່າວໄດ້ເຮັດໃຫ້ນັກທ່ອງທ່ຽວຈີນ 32 ຄົນ ແລະ ພະນັກງານຂອງ ສປປ ເກົາຫຼີ 4 ຄົນເສຍຊີວິດ, ນັກທ່ອງທ່ຽວຈີນ 2 ຄົນບາດເຈັບສາຫັດ. ຕອນທ່ຽງວັນທີ 23 ເມສານີ້, ຈີນໄດ້ສົ່ງໜ່ວຍງານທີ່ກ່ຽວຂ້ອງແລະຜູ້ຊ່ຽວຊານດ້ານການປິ່ນປົວໄປ ສປປ ເກົາຫຼີ ຢ່າງສຸກເສີນ ເພື່ອຮ່ວມກັບ ສປປ ເກົາຫຼີ ດຳເນີນການປິ່ນປົວແລະເຮັດວຽກງານອື່ນໆທີ່ກ່ຽວຂ້ອງ.
ທ່ານ ລູ້ຄ່າງ ກ່າວວ່າ, ລັດຖະບານຈີນໄດ້ໃຫ້ຄວາມສຳຄັນຢ່າງສູງຕໍ່ຄວາມປອດໄພຂອງພົນລະເມືອງຈີນຢູ່ຕ່າງປະເທດມາໂດຍຕະຫຼອດ. ຫຼັງຈາກເກີດເຫດແລ້ວ, ກະຊວງການຕ່າງປະເທດຈີນ ແລະ ສະຖານທູດຈີນປະຈຳ ສປປ ເກົາຫຼີ ໄດ້ດຳເນີນກົນໄກພາວະສຸກເສີນໃນທັນທີ, ຈີນຈະຮັກສາການຕິດຕໍ່ແລະປະສານງານກັບ ສປປ ເກົາຫຼີ ຢ່າງໃກ້ຊິດເພື່ອແກ້ໄຂທຸກບັນຫາພາຍຫຼັງເຫດໃຫ້ດີຂຶ້ນ.
