ໂຄສົກກະຊວງການຕ່າງປະເທດຈີນໃຫ້ຄວາມກະຈ່າງແຈ້ງການພົບປະບໍ່ເປັນທາງການລະຫວ່າງຜູ້ນຳຈີນ-ອິນເດຍ
ວັນທີ 24 ເມສານີ້, ທ່ານລູ້ຄ່າງ ໂຄສົກກະຊວງການຕ່າງປະເທດຈີນ ໄດ້ຕອບຄຳຖາມຂອງນັກຂ່າວກ່ຽວກັບການພົບປະບໍ່ເປັນທາງການລະຫວ່າງຜູ້ນຳຈີນ-ອິນເດຍທີ່ຈະມີຂຶ້ນໃນໄວໆນີ້ວ່າ: ຈີນ ແລະອິນເດຍ ເປັນເອກະສັນກັນເຫັນວ່າ ການພົບປະບໍ່ເປັນທາງການຈະສາມາດສ້າງບັນຍາກາດທີ່ເໝາະສົມໃຫ້ແກ່ຜູ້ນຳສອງປະເທດ ເພື່ອແລກປ່ຽນກັນຢ່າງເຕັມສ່ວນແລະເລິກເຊິ່ງກ່ຽວກັບບັນຫາທີ່ສົນໃຈຮ່ວມກັນ.
ທ່ານລູ້ຄ່າງ ກ່າວວ່າ: ໃນຊຸມປີຜ່ານມາ, ທ່ານສີຈິ້ນຜິງ ປະທານປະເທດຈີນ ແລະ ທ່ານນາເຣນດຣາ ໂມດີ ນາຍົກລັດຖະມົນຕີອິນເດຍ ໄດ້ແລກປ່ຽນກັນຫຼາຍເທື່ອດ້ວຍຫຼາຍຮູບແບບ ແລະໂດຍປະເຊີນກັບສະຖານະການໂລກທີ່ມີການປ່ຽນແປງຢ່າງໃຫຍ່ແບບບໍ່ເຄີຍມີມາໃນຮອບ 100 ປີ ແລະປະເຊີນກັບຄວາມບໍ່ແນ່ນອນໃນສະຖານະການສາກົນໃນປັດຈຸບັນ, ທ່ານປະທານສີຈິ້ນຜິງ ແລະທ່ານນາຍົກລັດຖະມົນຕີໂມດີ ໃນຖານະເປັນຜູ້ນຳຂອງສອງປະເທດທີ່ພວມພັດທະນາທີ່ໃຫຍ່ທີ່ສຸດ ກໍລ້ວນແຕ່ເຫັນວ່າ ຈີນແລະອິນເດຍມີຄວາມຕ້ອງການໃນການແລກປ່ຽນຢ່າງເລິກເຊິ່ງກ່ຽວກັບບັນຫາທີ່ມີລັກສະນະໄລຍະຍາວນານ, ຮອບດ້ານ ແລະ ເປັນບັນຫາຍຸດທະສາດ ໃນການພົວພັນລະຫວ່າງສອງປະເທດ ແລະກິດຈະການສາກົນ.
