ກອງປະຊຸມລັດຖະມົນຕີປ້ອງກັນປະເທດຂອງປະເທດສະມາຊິກອົງການຮ່ວມມືຊຽງໄຮຈັດຂຶ້ນຢູ່ປັກກິ່ງ
2018-04-25 11:16:30 cri
ກອງປະຊຸມລັດຖະມົນຕີປ້ອງກັນປະເທດຂອງປະເທດສະມາຊິກອົງການຮ່ວມມືຊຽງໄຮຄັ້ງທີ 15 ໄດ້ຈັດຂຶ້ນຢູ່ນະຄອນຫຼວງປັກກິ່ງໃນວັນທີ 24 ເມສານີ້, ທ່ານ ເວີ້ຍເຟີ້ງເຮີ ທີ່ປຶກສາແຫ່ງລັດທັງເປັນລັດຖະມົນຕີກະຊວງປ້ອງກັນປະເທດຈີນໄດ້ເປັນປະທານແລະກ່າວປາໄສທີ່ສຳຄັນໃນກອງປະຊຸມ ທີ່ເນັ້ນ"ສ້າງປະຊາຄົມຮ່ວມຊາຕາກຳ,ສະແຫວງຫາການພັດທະນາແລະການຮ່ວມມືທີ່ມີການປະດິດສ້າງໃໝ່".
ໃນກອງປະຊຸມ, ລັດຖະມົນຕີກະຊວງປ້ອງກັນປະເທດຂອງບັນດາປະເທດໄດ້ສະຫຼຸບຜົນສຳເລັດຈາກການຮ່ວມມືນັບແຕ່ກອງປະຊຸມລັດຖະມົນຕີປ້ອງກັນປະເທດປີ 2017 ເປັນຕົ້ນມາ, ຕ່າງກໍ່ໄດ້ກ່າວປາໄສກ່ຽວກັບບັນຫາຕ່າງໆເຊັ່ນ:ສະຖານະການຄວາມໝັ້ນຄົງຂອງພາກພື້ນແລະສາກົນ,ເພີ່ມທະວີການຮ່ວມມືດ້ານວຽກງານປ້ອງກັນຄວາມໝັ້ນຄົງຂອງອົງການຮ່ວມມືຊຽງໄຮແລະບັນຫາອື່ນໆ,ທັງໄດ້ເນັ້ນວ່າພາຍໃຕ້ສະຖານະການສາກົນທີ່ນັບມື້ນັບມີຄວາມສັບສົນຂຶ້ນໃນປັດຈຸບັນ, ພາກສ່ວນປ້ອງກັນຄວາມໝັ້ນຄົງແລະກອງທັບຂອງບັນດາປະເທດສະມາຊິກອົງການຮ່ວມມືຊຽງໄຮຄວນເພີ່ມທະວີການຮ່ວມມືຕື່ມອີກ,ຄຽງບ່າຄຽງໄຫຼ່ແລະຮ່ວມມືກັນເພື່ອຮັບມືກັບໄພຂົ່ມຂູ່ແລະສິ່ງທ້າທາຍທີ່ຜະເຊີນຮ່ວມກັນ.
