ກຳມະກອນໄທແຫ່ຂະບວນໃນວັນກຳມະກອນສາກົນເພື່ອຮຽກຮ້ອງການຮັບປະກັນສິດຜົນປະໂຫຍດຂອງຊາວຜູ້ອອກແຮງງານ
2018-05-02 14:52:24 cri
ວັນທີ 1 ພຶດສະພານີ້, ກຳມະກອນໄທໝື່ນກວ່າຄົນໄດ້ແຫ່ຂະບວນໃນວັນກຳມະກອນສາກົນຢູ່ນະຄອນຫຼວງບາງກອກຂອງໄທ, ຮຽກຮ້ອງໃຫ້ລັດຖະບານຮັບປະກັນສິດຜົນປະໂຫຍດທີ່ຊອບກົດໝາຍຂອງຊາວຜູ້ອອກແຮງງານ, ຄັດຄ້ານລັດວິສາຫະກິດຫັນເປັນວິສາຫະກິດເອກະຊົນ.
ຕອນເຊົ້າວັນທີ 1 ພຶດສະພານີ້, ກຳມະກອນທີ່ເຂົ້າຮ່ວມການແຫ່ຂະບວນເຕົ້າໂຮມກັນຢູ່ອະນຸສາວະລີໄຊສະໝໍລະພູມໃນນະຄອນຫຼວງບາງກອກທ່າມກາງອາກາດທີ່ມີຝົນຕົກແຮງ, ແລະແຫ່ຂະບວນໄປເຖິງທຳນຽບລັດຖະບານ.
ທ່ານມະນັດ ໂກສົນ ປະທານສະພາອົງການລູກຈ້າງແຮງງານແຫ່ງປະເທດໄທກ່າວວ່າ, ອົງການຈັດຕັ້ງແຮງງານໄທຮຽກຮ້ອງໃຫ້ມີການຮັບປະກັນໃຫ້ກຳມະກອນໄທມີສະຫວັດດີການແລະເງິນເບັ້ຍບຳນານຫຼາຍກວ່າເກົ່າ, ຂະນະດຽວກັນຮຽກຮ້ອງໃຫ້ລັດຖະບານສົນໃຈນຳຄວາມເສຍຫາຍຕໍ່ກຳມະກອນຂະນະທີ່ລັດວິສາຫະກິດຫັນເປັນວິສາຫະກິດເອກະຊົນ.
ຕາມຂ່າວແຈ້ງວ່າ, ຕອນຄ່ຳວັນທີ 1 ພຶດສະພານີ້, ທ່ານປຣະຍຸດ ຈັນໂອຊາ, ນາຍົກລັດຖະມົນຕີໄທໄດ້ເຂົ້າຮ່ວມກິດຈະກຳລະນຶກວັນກຳມະກອນສາກົນ, ແລະຮັບຟັງຂໍ້ຮຽກຮ້ອງຂອງຜູ້ຕາງໜ້າກຳມະກອນ.
