ຜູ້ຊາຍແດນມາກຜູ້ໜຶ່ງຖືກຕັດສິນຕັດອິດສະຫຼະພາບຍ້ອນລະເມີດກົດໝາຍຕ້ານຂ່າວປອມຂອງມາເລເຊຍ
2018-05-02 16:22:21 cri
ວັນທີ 30 ເມສາຜ່ານມາ, ຜູ້ຊາຍແດນມາກຜູ້ໜຶ່ງທີ່ກ່າວວ່າເຈົ້າໜ້າທີ່ຕຳຫຼວດມາເລເຊຍມີປະຕິກິລິຍາຊັກຊ້າຕໍ່ຄະດີລອບຂ້ານັ້ນ ຖືກສານມາເລເຊຍຕັດສິນຕັດອິດສະຫຼະພາບ 7 ວັນ ທັງປັບໃໝເງິນ 1 ໝື່ນລິງກິດ. ນີ້ແມ່ນຄະດີທຳອິດທີ່ຖືກລົງໂທດຍ້ອນລະເມີດ "ກົດໝາຍຕ້ານຂ່າວປອມ" ຂອງມາເລເຊຍ.
ຊາວແດນມາກຜູ້ນີ້ຊື່ວ່າ ຊາລາເຮີ ຊາລິມ ຊາລິເຮີ ຊູໄລມັນ, ປີນີ້ອາຍຸ 46 ປີ. ລາວຖືກກ່າວຟ້ອງໃນຂໍ້ຫາແຈ້ງຂ່າວປອມໂດຍມີເຈຕະນາທີ່ບໍ່ດີພາຍຫຼັງອາຈານປາເລັສຕີນຜູ້ໜຶ່ງຖືກລອບຂ້າຕາມຖະໜົນມາເລເຊຍໃນວັນທີ 21 ເມສາຜ່ານມາ. ໃນວິດີໂອຕອນໜຶ່ງທີ່ເຜີຍແຜ່ລົງສື່ສັງຄົມອອນໄລ, ຊາລາເຮີ ກ່າວວ່າ, ຫຼັງຈາກເກີດຄະດີນັ້ນແລ້ວ, ລາວໄດ້ໂທລະສັບແຈ້ງຄວາມຫຼາຍເທື່ອ, ແຕ່ເຈົ້າໜ້າທີ່ຕຳຫຼວດໃຊ້ເວລາ 50 ນາທີຈຶ່ງມາຮອດບ່ອນເກີດເຫດ.
ທ່ານ ເຟຊີ ຜູ້ບັນຊາການໃຫຍ່ຕຳຫຼວດມາເລເຊຍ ໄດ້ກ່າວຕອບໂຕ້ເລື່ອງນີ້ວ່າ, ຫຼັງຈາກເກີດເຫດແລ້ວບໍ່ຮອດ 10 ນາທີ, ເຈົ້າໜ້າທີ່ຕຳຫຼວດກໍຂັບລົດລາຕະເວນຮອດບ່ອນເກີດເຫດ, ຄຳເວົ້າຂອງ ຊາຊາເຮີ ໄດ້ທຳລາຍຊື່ສຽງຂອງຕຳຫຼວດ ແລະ ປະເທດມາເລເຊຍ. ວັນທີ 23 ເມສາຜ່ານມາ, ເຈົ້າໜ້າທີ່ຕຳຫຼວດໄດ້ຈັບກຸມຊາລາເຮີຕາມກົດໝາຍຕ້ານຂ່າວປອມ ທັງດຳເນີນການສືບສວນ.
ຊາລາເຮີໄດ້ຮັບສາລະພາບຕໍ່ການກ່າວຟ້ອງທີ່ກ່ຽວຂ້ອງ, ທັງໄດ້ກ່າວຂໍໂທດຕໍ່ເຈົ້າໜ້າທີ່ຕຳຫຼວດແລະປະຊາຊົນມາເລເຊຍ.
