ຕົວເລກດັດຊະນີຄວາມໝັ້ນໃຈຂອງຜູ້ບໍລິໂພກໄທໃນເດືອນເມສາຜ່ານມາໄດ້ສ້າງສະຖິຕິສູງສຸດໃນ 40 ເດືອນຜ່ານມາ
2018-05-03 16:23:37 cri
ວັນທີ 2 ພຶດສະພານີ້, ສູນຄາດຄະເນເສດຖະກິດແລະການຄ້າຂອງມະຫາວິທະຍາໄລຫໍການຄ້າໄທໄດ້ເຜີຍແຜ່ບົດລາຍງານການສຳຫຼວດສະບັບໜຶ່ງໂດຍສະແດງໃຫ້ເຫັນວ່າ, ຍ້ອນໄດ້ຮັບຜົນປະໂຫຍດຈາກຂະແໜງການສົ່ງອອກແລະການທ່ອງທ່ຽວທີ່ເຂັ້ມແຂງ, ເດືອນເມສາຜ່ານມາ, ຕົວເລກດັດຊະນີຄວາມໝັ້ນໃຈຂອງຜູ້ບໍລິໂພກໄທໄດ້ສ້າງສະຖິຕິສູງສຸດໃນ 40 ເດືອນຜ່ານມາ.
ຜົນການສຳຫຼວດສະແດງໃຫ້ເຫັນວ່າ, ເດືອນເມສາປີນີ້, ຕົວເລກດັດຊະນີຄວາມໝັ້ນໃຈຂອງຜູ້ບໍລິໂພກໄທໄດ້ມີເຖິງ 80,9, ຫຼາຍກວ່າ 79,9 ໃນເດືອນມີນາປີນີ້ ໄດ້ສ້າງສະຖິຕິສູງສຸດນັບແຕ່ເດືອນມັງກອນປີ 2015 ເປັນຕົ້ນມາ.
ແຕ່ວ່າ, ສູນດັ່ງກ່າວຢືນຢັນວ່າ, ຜົນການສຳຫຼວດກໍ່ສະແດງໃຫ້ເຫັນວ່າ ຜູ້ບໍລິໂພກເຫັນວ່າເສດຖະກິດໄທຍັງຟື້ນຕົວຊ້າ, ອາດຈະຈຳກັດລາຍຈ່າຍ. ຂະນະດຽວກັນ, ສະພາບການການຄ້າແລະສະພາບລາຄາຜະລິດຕະພັນກະສິກຳຂອງໂລກຕົກຕ່ຳຍັງເຮັດໃຫ້ຄົນມີຄວາມເປັນຫ່ວງຄືເກົ່າ.
ຕາມຕົວເລກຂໍ້ມູນທາງການສະແດງໃຫ້ເຫັນວ່າ, ໃນໄຕມາດທຳອິດປີນີ້, ຍອດມູນຄ່າການສົ່ງອອກຂອງໄທໄດ້ບັນລຸເຖິງ 62,8 ຕື້ໂດລາສະຫະລັດ, ເພີ່ມຂຶ້ນ 11,3% ເມື່ອທຽບໃສ່ໄລຍະດຽວກັນຂອງປີກາຍ. ໃນໄຕມາດດັ່ງກ່າວ, ໄທໄດ້ຕ້ອນຮັບນັກທ່ອງທ່ຽວສາກົນ 10,6 ລ້ານເທື່ອຄົນ, ເພີ່ມຂຶ້ນຫຼາຍກວ່າ 15% ເມື່ອທຽບໃສ່ໄລຍະດຽວກັນຂອງປີກາຍ.
