ການປຶກສາຫາລືແມ່ນສອດຄ່ອງກັບຜົນປະໂຫຍດຮ່ວມຂອງຈີນ-ອາເມລິກາ
2018-05-03 16:11:53 cri
ທ່ານ ມູນູຊິນ ທູດພິເສດປະທານາທິບໍດີ ທັງເປັນລັດຖະມົນຕີກະຊວງການເງິນອາເມລິກາ ຈະນຳພາຄະນະຜູ້ແທນອາເມລິກາມາຢ້ຽມຢາມຈີນແຕ່ວັນທີ 3-4 ພຶດສະພານີ້. ທ່ານ ລິວເຮີ້ ກຳມະການກົມການເມືອງສູນກາງພັກກອມມູນິດຈີນ, ຮອງນາຍົກລັດຖະມົນຕີຈີນ ຈະແລກປ່ຽນຄວາມຄິດເຫັນກັບຄະນະຜູ້ແທນອາເມລິກາກ່ຽວກັບບັນຫາເສດຖະກິດການຄ້າທີ່ສອງຝ່າຍສົນໃຈຮ່ວມກັນ. ໃນເວລາຕອບຄຳຖາມຂອງນັກຂ່າວກ່ຽວກັບເລື່ອງນີ້ໃນກອງປະຊຸມຖະແຫຼງຂ່າວໃນວັນທີ 2 ພຶດສະພານີ້, ທ່ານນາງ ຮວ້າຊຸ່ນຢິງ ໂຄສົກກະຊວງການຕ່າງປະເທດຈີນກ່າວວ່າ, ການແກ້ໄຂຄວາມຂັດແຍ້ງກັນຢ່າງເໝາະສົມໂດຍຜ່ານການປຶກສາຫາລືກັນນັ້ນ ແມ່ນສອດຄ່ອງກັບຜົນປະໂຫຍດຮ່ວມຂອງສອງປະເທດ.
ທ່ານນາງ ຮວ້າຊຸ່ນຢິງ ກ່າວວ່າ, ໃນຖານະເປັນກຸ່ມເສດຖະກິດໃຫຍ່ອັນດັບ 1 ແລະ 2 ໃນໂລກ, ການທີ່ຈີນແລະອາເມລິກາແກ້ໄຂຄວາມຂັດແຍ້ງກັນໂດຍຜ່ານການປຶກສາຫາລືກັນ ແລະປົກປັກຮັກສາສະພາບລວມແຫ່ງການພົວພັນເສດຖະກິດການຄ້າທີ່ໜັກແໜ້ນລະຫວ່າງສອງປະເທດນັ້ນ ບໍ່ຕ້ອງສົງໄສວ່າ ມັນສອດຄ່ອງກັບຜົນປະໂຫຍດຮ່ວມຂອງສອງປະເທດຈີນ-ອາເມລິກາ, ທັງແມ່ນຄວາມຫວັງຮ່ວມຂອງບັນດາປະເທດໃນໂລກ ເຊິ່ງມີຄວາມໝາຍສຳຄັນຕໍ່ການຟື້ນຟູແລະຄວາມໜັກແໜ້ນຂອງເສດຖະກິດໂລກ.
