ການຮ່ວມມືທາງເສດຖະກິດດິຈິຕອນຈີນ-ອິນໂດເນເຊຍມີອະນາຄົດອັນສົດໃສ
2018-05-04 16:15:37 cri
ທ່ານ ຣູດີອັນຕາຣາ ລັດຖະມົນຕີກະຊວງເຕັກໂນໂລຊີການສື່ສານແລະ ຂໍ້ມູນຂ່າວສານອິນໂດເນເຊຍ ໄດ້ໃຫ້ສຳພາດຕໍ່ນັກຂ່າວຈີນໃນຫວ່າງມໍ່ໆມານີ້ວ່າ, ຍິນດີຕ້ອນຮັບແລະຂອບໃຈຫຼາຍຕໍ່ນັກລົງທຶນຈີນທີ່ໄດ້ສ້າງມູນຄ່າເພີ່ມ ຫຼາຍກວ່າເກົ່າໃຫ້ແກ່ເສດຖະກິດດິຈິຕອນ ແລະໄດ້ປະກອບສ່ວນໃນການເຝິກອົບຮົມກໍ່ສ້າງຜູ້ມີຄວາມສາມາດດ້ານເສດຖະກິດດິຈິຕອນຮຸ່ນໃໝ່ຂອງປະເທດຕົນ, ການຮ່ວມມືທາງເສດຖະກິດດິຈິຕອນລະຫວ່າງສອງປະເທດ ຈະມີອະນາຄົດທີ່ສົດໃສ.
ທ່ານ ຣູດີອັນຕາຣາ ກ່າວວ່າ, ເມື່ອເບິ່ງຈາກມຸມສະພາບແວດລ້ອມການລົງທຶນແລ້ວເຫັນວ່າ, ການເມືອງ, ເສດຖະກິດແລະສັງຄົມຂອງປະເທດຕົນ ພວມຢູ່ໃນໄລຍະທີ່ໜັກແໜ້ນທີ່ສຸດໃນຮອບ 10 ປີມານີ້; ເມື່ອເບິ່ງຈາກມຸມທ່ວງທ່າຂະຫຍາຍຕົວແລ້ວເຫັນວ່າ, ໃນ 3 ປີຜ່ານມາ, ສະເລ່ຍແລ້ວ ເສດຖະກິດປະເທດຕົນໄດ້ເຕີບໂຕ 5% ຕໍ່ປີ, ສະພາບເສດຖະກິດລວມຢູ່ໃນລະດັບກາງແລະສູງໃນບັນດາກຸ່ມເສດຖະກິດໃຫຍ່ຂອງໂລກ.
ທ່ານ ຣູດີອັນຕາຣາ ກ່າວຕື່ມວ່າ, ອິນໂດເນເຊຍຍິນດີຕ້ອນຮັບທີ່ສຸດຕໍ່ນັກລົງທຶນຈີນທີ່ສ້າງມູນຄ່າເພີ່ມໃຫ້ເສດຖະກິດດິຈິຕອນຂອງປະເທດຕົນ ຫຼາຍກວ່າເກົ່າ ແລະ ປະກອບສ່ວນເຂົ້າໃນການອົບຮົມກໍ່ສ້າງຜູ້ມີຄວາມສາມາດດ້ານເສດຖະກິດດິຈິຕອນຮຸ່ນໃໝ່ຂອງປະເທດຕົນ. ຊາວໜຸ່ມປະເທດຕົນຍັງຕ້ອງຮ່ຳຮຽນນຳປະເທດທີ່ກ້າວໜ້າເຊັ່ນຈີນເປັນຕົ້ນຢ່າງຖ່ອມຕົວແລະບໍ່ຢຸດຢັ້ງ, ຍົກລະດັບຕົນເອງຢ່າງບໍ່ຢຸດຢັ້ງເພື່ອບັນລຸເຖິງມາດຖານສາກົນແລະລະດັບໂລກ.
