ການປະທະກັນລະຫວ່າງອິສຣາແອນ-ປາແລັສຕິນເຮັດໃຫ້ຊາວປາແລັສຕິນ 1000 ກວ່າຄົນໄດ້ຮັບບາດເຈັບ
2018-05-05 14:13:31 cri
ວັນທີ 4 ພຶດສະພານີ້, ຊາວປາແລັສຕິນ ໄດ້ເດີນຂະບວນປະທ້ວງການຍຶດຄອງຂອງອິສຣາແອນ ຢູ່ຫຼາຍທ້ອງຖິ່ນ ແລະທະຫານອິສຣາແອນໄດ້ຍິງປືນຫຼືຍິງແກັສນ້ຳຕາສະຫຼາຍຜູ້ປະທ້ວງ. ຕາມສະຖິຕິຂອງກະຊວງສາທາລະນະສຸກປາແລັສຕິນ, ເຫດການປະທະກັນໃນວັນດຽວກັນໄດ້ສົ່ງຜົນເຮັດໃຫ້ຊາວປາແລັສຕິນ 1143 ຄົນໄດ້ຮັບບາດເຈັບ,ໃນນີ້ 3 ຄົນບາດເຈັບສາຫັດ.
ເຫດການປະທະກັນທີ່ຮຸນແຮງທີ່ສຸດເກີດຂຶ້ນຢູ່ເຂດຊາຍແດນພາກຕາເວັນອອກເຂດກາຊາທີ່ຕໍ່ແດນກັບອິສຣາແອນ, ຜູ້ປະທ້ວງຊາວປາແລັສຕິນຫຼາຍຮ້ອຍຄົນໄດ້ຈູດເຜົາຕີນລົດເກົ່າ ທັງດຶກກ້ອນຫີນໃສ່ທະຫານອິສຣາແອນທີ່ເຝົ້າປະຈຳປ້ອງກັນຊາຍແດນ ແລະທະຫານອິສຣາແອນໄດ້ຍິງແກັສນ້ຳຕາຫຼືຍິງປືນໃສ່ກຸ່ມຄົນປະທ້ວງ.
ວັນທີ 30 ມີນາຜ່ານມາ, ຊາວປາແລັສຕິນໄດ້ເປີດການເດີນຂະບວນປະທ້ວງເພື່ອສິດກັບຄືນບ້ານເມືອງຢູ່ເຂດຊາຍແດນກາຊາ. ໃນໄລຍະເດືອນກວ່າມານີ້, ຊາວປາແລັສຕິນກັບທະຫານອິຣາແອນໄດ້ປະທະກັນເປັນປະຈຳຢູ່ເຂດຊາຍແດນ ສົ່ງຜົນເຮັດໃຫ້ຊາວປາແລັສຕິນເສຍຊີວິດແລະບາດເຈັບ. ຕາມຂ່າວແຈ້ງວ່າ: ການເດີນຂະບວນປະທ້ວງເພື່ອສິດກັບຄືນບ້ານເມືອງຈະດຸເດືອດສຸດໃນວັນທີ 15 ພຶດສະພານີ້ ທີ່ເປັນວັນລະນຶກຄວາມພິນາດປາແລັສຕິນຄົບຮອບ 70 ປີ.