ເຈົ້າໜ້າທີ່ລັດຖະບານອິນໂດເນເຊຍຫວັງວ່າການຢ້ຽມຢາມຂອງທ່ານນາຍົກຫຼີເຄີ້ສຽງຈະເສີມຂະຫຍາຍສາຍພົວພັນສອງປະເທດຕື່ມອີກ
2018-05-05 14:41:44 cri
ໂດຍຕອບສະໜອງຕາມຄຳເຊີນຂອງທ່ານ ໂຈໂກ ວິໂດໂດ ປະທານາທິບໍດີອິນໂດເນເຊຍ, ທ່ານຫຼີເຄີ້ສຽງ ນາຍົກລັດຖະມົນຕີຈີນຈະຢ້ຽມຢາມອິນໂດເນເຊຍຢ່າງເປັນທາງການແຕ່ວັນທີ 6-8 ພຶດສະພານີ້. ທ່ານລູຮຸດ ບິນຊາ ປານໄຈທັນ ລັດຖະມົນຕີກະຊວງປະສານງານວຽກທາງທະເລອິນໂດເນເຊຍຢືນຢັນວ່າ: ປະທານາທິບໍດີໂຈໂກ ວິໂດໂດໃຫ້ຄວາມສຳຄັນສູງຕໍ່ການຢ້ຽມຢາມຂອງທ່ານນາຍົກຫຼີເຄີ້ສຽງ, ຫວັງວ່າການຢ້ຽມຢາມເທື່ອນີ້ຈະສາມາດເສີມຂະຫຍາຍສາຍພົວພັນລະຫວ່າງສອງປະເທດຕື່ມອີກ ເພື່ອສ້າງໂອກາດໃໝ່ໃຫ້ແກ່ການຮ່ວມມືສອງຝ່າຍໃນດ້ານເສດຖະກິດການຄ້າແລະການລົງທຶນ.
ໃນໄລຍະທ່ານຫຼີເຄີ້ສຽງຢ້ຽມຢາມອິນໂດເນເຊຍ, ສອງປະເທດຈະເຊັນສັນຍາຮ່ວມມືຫຼາຍສະບັບເຊິ່ງກ່ຽວພັນເຖິງຫຼາຍຂົງເຂດເປັນຕົ້ນ ການເຊື່ອມຕໍ່ຍຸດທະສາດ,ທຸລະກິດເອເລັກໂຕຣນິກ,ການຮ່ວມມືດ້ານກະສິກຳແລະອື່ນໆ. ທ່ານລູຮຸດກ່າວຕໍ່ເລື່ອງນີ້ວ່າ: ການຮ່ວມມືດ້ານເສດຖະກິດການຄ້າລະຫວ່າງອິນໂດເນເຊຍ-ຈີນມີການຊ່ວຍຊູຍູ້ໜູນກັນຫຼາຍ, ການຢ້ຽມຢາມຂອງທ່ານນາຍົກຫຼີເຄີ້ສຽງເທື່ອນີ້ຈະນຳເອົາໂອກາດໃໝ່ມາສູ່ການຮ່ວມມືດ້ານເສດຖະກິດການຄ້າແລະເຕັກນິກລະຫວ່າງສອງປະເທດ.
