ອົງການຈັດຕັ້ງທາງສັງຄົມໄທໂຮມຊຸມນຸມເພື່ອຮຽກຮ້ອງດຳເນີນການເລືອກຕັ້ງທົ່ວໄປໃນປີນີ້
ຕອນບ່າຍວັນທີ 5 ພຶດສະພານີ້, ປະຊາຊົນໄທຈຳນວນຫຼວງຫຼາຍ ໄດ້ໂຮມຊຸມນຸມຢູ່ໃນມະຫາວິທະຍາໄລທຳມະສາດ ນະຄອນຫຼວງບາງກອກ ປະເທດໄທ ເພື່ອຮຽກຮ້ອງໃຫ້ລັດຖະບານໄທດຳເນີນການເລືອກຕັ້ງທົ່ວໄປໃນປີນີ້ຕາມສັນຍາທີ່ໄດ້ໃຫ້ໄວ້.
ການໂຮມຊຸມນຸມເທື່ອນີ້ຈັດຂຶ້ນໂດຍອົງການຈັດຕັ້ງທາງສັງຄົມທີ່ມີຊື່ວ່າ "ພວກເຮົາຕ້ອງການຂະບວນການລົງຄະແນນສຽງ" ໂດຍທ່ານຣັງສີມັນ ໂຣມ ຜູ້ຮັບຜິດຊອບອົງການດັ່ງກ່າວ ກ່າວວ່າ: ອົງການຕົນໄດ້ເຕົ້າໂຮມກຳລັງມະຫາຊົນທີ່ຫວັງໃຫ້ດຳເນີນການເລືອກຕັ້ງທົ່ວໄປ ແລະ ການໂຮມຊຸມນຸມເທື່ອນີ້ຕົ້ນຕໍມີຂໍ້ຮຽກຮ້ອງ 3 ຂໍ້ ຄື ໜຶ່ງ, ຮຽກຮ້ອງໃຫ້ດຳເນີນການເລືອງຕັ້ງທົ່ວໄປກ່ອນເດືອນພະຈິກປີນີ້ຕາມສັນຍາທີ່ລັດຖະບານໄດ້ໃຫ້ໄວ້ ສອງ, ຄວນຍຸບຄະນະຮັກສາຄວາມສະຫງົບແຫ່ງຊາດທີ່ສ້າງຕັ້ງຂຶ້ນຫຼັງການລັດຖະປະຫານເມື່ອປີ 2014 ນັ້ນໂດຍໄວ ເພື່ອຮັບປະກັນບໍ່ໃຫ້ຄະນະຮັກສາຄວາມສະຫງົບແຫ່ງຊາດເຂົ້າແຊກແຊງເສລີພາບຂອງການເລືອກຕັ້ງທົ່ວໄປ ແລະ ສາມ, ເຈົ້າໜ້າທີ່ທະຫານບໍ່ຄວນສືບຕໍ່ສະໜັບສະໜູນໃຫ້ຄະນະຮັກສາຄວາມສະຫງົບແຫ່ງຊາດກຳອຳນາດຕໍ່ໄປ.
