ທູດພິເສດຂອງຈີນປຶກສາຫາລືສະຖານະການຕາເວັນອອກກາງກັບເຈົ້າໜ້າທີ່ຊາອຸດອາຣັບບີ
2018-05-07 16:11:19 cri
ວັນທີ 6 ພຶດສະພານີ້, ທ່ານ ກົ່ງສຽວເຊິ່ງ ທູດພິເສດບັນຫາຕາເວັນອອກກາງຂອງຈີນທີ່ພວມຢ້ຽມຢາມຊາອຸດອາຣັບບີ ໄດ້ເຈລະຈາກັບເຈົ້າໜ້າທີ່ລັດຖະບານຊາອຸດອາຣັບບີກ່ຽວກັບສະຖານະການຕາເວັນອອກກາງ.
ໃນໂອກາດພົບປະກັບທ່ານ ຈາມານ ອາກິວ ຮອງລັດຖະມົນຕີວຽກງານການເມືອງແລະເສດຖະກິດຂອງກະຊວງການຕ່າງປະເທດຊາອຸດອາຣັບບີ, ທ່ານ ກົ່ງສຽວເຊິ່ງ ກ່າວວ່າ, ປັດຈຸບັນ, ສະຖານະການຕາເວັນອອກກາງສັບສົນຫຼາຍ. ສົງຄາມກາງເມືອງຊີຣີ, ການປະທະກັນລະຫວ່າງປາເລັສຕິນກັບອິດສະລາແອນ, ສົງຄາມຢູ່ເຢແມນ ແລະ ຄວາມຂັດແຍ້ງກັນກ່ຽວກັບສັນຍານິວເຄລຍອີຣານ ເປັນໄພຂົ່ມຂູ່ຕໍ່ສັນຕິພາບແລະສະຖຽນລະພາບຂອງພາກພື້ນຢ່າງໜັກໜ່ວງ. ໃນຖານະເປັນເພື່ອນມິດຂອງປະເທດຕາເວັນອອກກາງ, ຈີນຫວັງໃຫ້ປະເທດໃນພາກພື້ນຈົ່ງແກ້ໄຂຄວາມຂັດແຍ້ງກັນໂດຍຜ່ານການສົນທະນາທາງການເມືອງ ເພື່ອສິ້ນສຸດການປະທະກັນແບບນອງເລືອດໂດຍໄວ ແລະ ບັນລຸສັນຕິພາບແລະສະຖຽນລະພາບຂອງພາກພື້ນຕາເວັນອອກກາງ. ຈີນຍິນດີສືບຕໍ່ເສີມຂະຫຍາຍບົດບາດຊຸກຍູ້ການເຈລະຈາສັນຕິພາບ ເພື່ອໃຫ້ແກ້ໄຂບັນຫາທີ່ກ່ຽວຂ້ອງຢ່າງເໝາະສົມໂດຍໄວ.
ທ່ານ ອາກິວ ໄດ້ຕີລາຄາສູງຕໍ່ຈີນທີ່ໄດ້ມີຫຼັກໝັ້ນທີ່ຍຸຕິທຳ, ທ່ຽງທຳ ແລະບໍ່ສະແຫວງຫາຜົນປະໂຫຍດສ່ວນຕົວໃນບັນຫາຕາເວັນອອກກາງ ແລະ ກ່າວວ່າ, ຫວັງວ່າຈີນຈະນຳໃຊ້ອິດທິພົນທີ່ນັບມື້ນັບເພີ່ມຂຶ້ນໃນສາກົນ ແລະ ທ່າແຮງພິເສດທີ່ມີໄມຕີຈິດມິດຕະພາບກັບປະເທດໃນພາກພື້ນ ເພື່ອເສີມຂະຫຍາຍບົດບາດໃຫຍ່ກວ່າເກົ່າໃນຂະບວນການສັນຕິພາບຕາເວັນອອກກາງ.
