ເປີດຊຸດອົບຮົມທ່ານໝໍໂຮງໝໍຫຼວງພະບາງຢູ່ນະຄອນຄຸນມິງ
2018-05-07 16:22:00 cri
ພິທີເປີດຊຸດອົບຮົມທ່ານໝໍໂຮງໝໍຫຼວງພະບາງຂອງລາວ ໄດ້ຈັດຂຶ້ນຢູ່ນະຄອນຄຸນມິງແຂວງຢູນນານ ສປ ຈີນໃນຫວ່າງກ່ອນນີ້ບໍ່ດົນ.
ຊຸດອົບຮົມດັ່ງກ່າວ ໄດ້ຈັດໃຫ້ທ່ານໝໍຜູ້ເປັນຫຼັກແຫຼ່ງຂອງໂຮງໝໍຫຼວງພະບາງ ໄປຍົກລະດັບຢູ່ໂຮງໝໍປະຊາຊົນເລກໜຶ່ງແຂວງຢູນນານເປັນເວລາ 3 ເດືອນເຊິ່ງຈະໄດ້ອົບຮົມຫຼາຍຢ່າງຄື: ການຜ່າຕັດແກ່ນຕາຂຸ້ນ, ການນຳໃຊ້ແລະກວດກາດ້ວຍກ້ອງສ່ອງກະເພາະອາຫານ, ການບົ່ງມະຕິພະຍາດດ້ວຍອຸຕຣາຊໍນິກ B ແລະອື່ນໆ, ທັງມີການບັນຍາຍຄວາມຮູ້ແພດສາດ, ການລອກແບບຝີມືຕ່າງໆ, ການປຶກສາຫາລືອາການຄົນເຈັບຈາກຫຼາຍພະແນກ, ວິທີຕິດຕໍ່ພົວພັນກັບຄົນເຈັບ ແລະອື່ນໆ.
ທ່ານ ທອງເພັດ ຜູ້ຕາງໜ້າໂຮງໝໍຫຼວງພະບາງກ່າວວ່າ, ຫວັງວ່າຈະສາມາດນຳເອົາເຕັກນິກຂອງໂຮງໝໍປະຊາຊົນເລກໜຶ່ງແຂວງຢູນນານກັບຄືນສູ່ລາວ ເພື່ອໃຫ້ປະຊາຊົນລາວຊົມໃຊ້ເຕັກນິກການແພດທີ່ດີກວ່າເກົ່າ, ພ້ອມກັນນັ້ນ, ຍັງຫວັງຢາກຖອດຖອນບົດຮຽນດ້ານລະບຽບການຄຸ້ມຄອງຂອງໂຮງໝໍປະຊາຊົນເລກໜຶ່ງຢູນນານ ແລ້ວຍົກລະດັບການບໍລິການຂອງໂຮງໝໍຫຼວງພະບາງໃຫ້ສູງຂຶ້ນ.
