ນາຍົກຈີນພົບປະກັບເລຂາທິການໃຫຍ່ອາຊຽນ
2018-05-08 10:28:48 cri
ຕອນບ່າຍວັນທີ 7 ພຶດສະພານີ້, ຢູ່ສຳນັກງານເລຂາອາຊຽນທີ່ນະຄອນຫຼວງຈາກາຕາປະເທດອິນໂດເນເຊຍ, ທ່ານຫຼີເຄີ້ສຽງ ນາຍົກລັດຖະມົນຕີຈີນໄດ້ພົບປະກັບທ່ານລິມຈອກຮອຍ ເລຂາທິການໃຫຍ່ອາຊຽນ.
ທ່ານຫຼີເຄີ້ສຽງກ່າວວ່າ: ຈີນໃຫ້ຄວາມສຳຄັນສູງຕໍ່ການຮ່ວມມືກັບອາຊຽນ ແລະຍິນດີຖືຈີນ-ອາຊຽນສ້າງຕັ້ງສາຍພົວພັນຄູ່ຮ່ວມຍຸດທະສາດຄົບຮອບ 15 ປີເປັນໂອກາດທີ່ດີເພື່ອຮ່ວມກັບອາຊຽນເສີມຂະຫຍາຍສາຍພົວພັນຄູ່ຮ່ວມຍຸດທະສາດໃຫ້ມີລະດັບສູງຂຶ້ນກວ່າເກົ່າ, ສ້າງປະຊາຄົມຮ່ວມຊາຕາກຳທີ່ແໜ້ນແຟ້ນກວ່າເກົ່າ. ສອງຝ່າຍຄວນເດັດດ່ຽວປົກປັກຮັກສາລັດທິຫຼາຍຝ່າຍແລະການຄ້າເສລີ, ສົ່ງເສີມການຮ່ວມມືໃນພາກພື້ນ, ຊຸກຍູ້ການເຈລະຈາສັນຍາສາຍພົວພັນຄູ່ຮ່ວມເສດຖະກິດຮອບດ້ານໃນພາກພື້ນຫຼືRCEPໃຫ້ໄດ້ຮັບຄວາມຄືບໜ້າຕົວຈິງ.
ທ່ານລິມຈອກຮອຍຍິນດີຕ້ອນຮັບທ່ານນາຍົກລັດຖະມົນຕີຫຼີເຄີ້ສຽງເດີນທາງມາຢ້ຽມຢາມສຳນັກງານກອງເລຂາອາຊຽນທັງຢືນຢັນວ່າ ອາຊຽນຍິນດີຕັ້ງໜ້າເຊື່ອມຕໍ່ຍຸດທະສາດຂອງສອງຝ່າຍ, ລົງເລິກການຮ່ວມມືດ້ານເສດຖະກິດການຄ້າກັບຈີນຕື່ມອີກ, ເປີດກວ້າງການໄປມາຫາສູ່ກັນລະຫວ່າງບຸກຄະລາກອນ, ຮ່ວມກັນຮັກສາລະບົບການຄ້າຫຼາຍຝ່າຍທີ່ເປີດປະຕູແລະປະຕິບັດຕາມລະບຽບການ, ສະໜັບສະໜູນເພື່ອບັນລຸສັນຍາRCEPໂດຍໄວເທົ່າທີ່ຈະໄວໄດ້ເພື່ອສ້າງຄວາມສົມບູນພູນສຸກໃຫ້ແກ່ປະຊາຊົນສອງຝ່າຍຫຼາຍກວ່າເກົ່າ ແລະປະກອບສ່ວນເຂົ້າໃນຄວາມຈະເລີນຮຸ່ງເຮືອງແລະສະຖຽນລະພາບຂອງພາກພື້ນກໍຄືຂອງໂລກ.
