ອີຣານກ່າວວ່າຈະຈົ່ງສັນຍານິວເຄລຍໄວ້ເປັນການຊົ່ວຄາວ
2018-05-09 15:03:06 cri
ຕອນຄ່ຳວັນທີ 8 ພຶດສະພານີ້, ທ່ານ ຮາຊານ ຣູຮານີ ປະທານາທິບໍດີອີຣານໄດ້ກ່າວປາໄສຜ່ານທາງໂທລະພາບວ່າ, ເຖິງວ່າອາເມລິກາຕົກລົງຖອນອອກຈາກສັນຍານິວເຄລຍອີຣານແລ້ວກໍຕາມ, ແຕ່ປະເທດຕົນຈະຈົ່ງ ສັນຍາໄວ້ເປັນການຊົ່ວຄາວ ທັງຈະປຶກສາຫາລືກັບຝ່າຍອື່ນໆທີ່ກ່ຽວຂ້ອງໃນສັນຍາ.
ທ່ານ ຣູຮານີ ກ່າວວ່າ, ນັບແຕ່ເວລານີ້ເປັນຕົ້ນໄປ, ສັນຍານິວເຄລຍອີຣານ ໄດ້ກາຍເປັນສັນຍາລະຫວ່າງປະເທດຕົນກັບ 5 ຝ່າຍອື່ນ. ໃນການປຶກສາຫາລືໃນຕໍ່ໜ້າ, ຖ້າຫາກວ່າຜົນປະໂຫຍດຂອງອີຣານທີ່ຖືກກຳນົດໃນສັນຍາ ບໍ່ສາມາດໄດ້ຮັບການປົກປ້ອງ, ອົງການພະລັງງານປະລະມານູອີຣານ ກໍຈະດຳເນີນການເຄື່ອນໄຫວກັ່ນຢູເຣນຽມຂຸ້ນໃນລະດັບໃດລະດັບໜຶ່ງຄືນໃໝ່. ທ່ານຍັງຕຳໜິອາເມລິກາທີ່ໄດ້ປະຕິບັດນະໂຍບາຍຖືອີຣານເປັນສັດຕູຕະຫຼອດເກືອບ 40 ປີຜ່ານມາ ແລະກໍບໍ່ໄດ້ປະຕິບັດພັນທະທີ່ກຳນົດໄວ້ໃນສັນຍານິວເຄລຍທີ່ເຊັນກັນເມື່ອປີ 2015.
ຕໍ່ການຂົ່ມຂູ່ທີ່ຈະຂວ້ຳບາດຂອງອາເມລິກາ, ທ່ານ ຣູຮານີ ກ່າວວ່າ, ເສດຖະກິດປະເທດຕົນຈະບໍ່ຖືກກະທົບ ແລະຕະຫຼາດພາຍໃນປະເທດຕົນ ຍັງສາມາດຮັກສາຄວາມໜັກແໜ້ນໄດ້.
