ຈີນເຫັນດີໃຫ້ RQFII ແກ່ຍີ່ປຸ່ນໃນໂຄຕາ 200 ຕື້ຢວນ
2018-05-09 17:10:09 cri
ຕອນບ່າຍວັນທີ 9 ພຶດສະພານີ້, ທ່ານ ຫຼີເຄີ້ສຽງ ນາຍົກລັດຖະມົນຕີຈີນ ໄດ້ພົບປະເຈລະຈາກັບທ່ານ ຊິນໂຈະ ອາເບະ ນາຍົກລັດຖະມົນຕີຍີ່ປຸ່ນ, ໂດຍກ່າວວ່າ, ພາຍໃຕ້ສະຖານະການໃໝ່, ຈີນແລະຍີ່ປຸ່ນຄວນປະສານກັບຄວາມຕ້ອງການການພັດທະນາເສດຖະກິດຂອງໃຜລາວ, ເພີ່ມທະວີການຮ່ວມມືໃນຂົງເຂດສຳຄັນຕ່າງໆ, ເຊັ່ນ: ການປະຢັດພະລັງງານ, ອະນຸລັກສິ່ງແວດລ້ອມ, ການປະດິດສ້າງໃໝ່ດ້ານວິທະຍາສາດເຕັກນິກ, ການຜະລິດລະດັບສູງ, ການເງິນ, ການທະນາຄານ, ເສດຖະກິດແບບຊົມໃຊ້ຮ່ວມກັນ, ການຮັກສາສຸຂະພາບ, ການເບິ່ງແຍງລ້ຽງດູຜູ້ສູງອາຍຸ ແລະອື່ນໆ. ສອງຝ່າຍໄດ້ບັນລຸຄວາມເປັນເອກະພາບກັນກ່ຽວກັບການເຊັນສັນຍາການແລກປ່ຽນເງິນຕາສະກຸນເງິນຕົນໂດຍໄວ, ທັງນີ້ຈະມີຜົນດີຕໍ່ການປົກປັກຮັກສາຄວາມໝັ້ນທ່ຽງຂອງຕະຫຼາດການທະນາຄານ ແລະ ຊຸກຍູ້ການລົງທຶນໃຫ້ມີຄວາມສະດວກກວ່າເກົ່າ. ຈີນເຫັນດີໃຫ້ນັກລົງທຶນທີ່ເປັນສະຖາບັນຂອງຕ່າງປະເທດທີ່ຖືກຕ້ອງຕາມມາດຖານ ຫຼື RQFII ໃນໂຄຕາ 200 ຕື້ຢວນແກ່ຍີ່ປຸ່ນ ເພື່ອສະໜັບສະໜູນສະຖາບັນການທະນາຄານຂອງຍີ່ປຸ່ນຕັ້ງໜ້າລົງທຶນຢູ່ຕະຫຼາດເງິນທຶນຈີນໂດຍຜ່ານ RQFII. ຂະນະດຽວກັນ, ຈີນກໍມີທ່າທີອັນຕັ້ງໜ້າຕໍ່ການສ້າງຕັ້ງທະນາຄານຊຳລະສະສາງເງິນຢວນຈີນຢູ່ນະຄອນຫຼວງໂຕກຽວຂອງຍີ່ປຸ່ນອີກດ້ວຍ.
