ຜູ້ນຳມຽນມາຕ້ອນຮັບທີ່ປຶກສາແຫ່ງລັດທັງເປັນລັດຖະມົນຕີກະຊວງປ້ອງກັນຄວາມສະຫງົບຈີນ
ວັນທີ 9 ພຶດສະພານີ້ຢູ່ນະຄອນຫຼວງເນປີດໍ, ທ່ານວິນມິນ ປະທານາທິບໍດີມຽນມາ, ທ່ານນາງອ໋ອງຊານຊູຈີ ທີ່ປຶກສາແຫ່ງລັດມຽນມາຕ່າງກໍໄດ້ພົບປະກັບທ່ານຈ້າວເຄີ້ຈື້ ທີ່ປຶກສາແຫ່ງລັດ, ລັດຖະມົນຕີກະຊວງປ້ອງກັນຄວາມສະຫງົບຈີນ.
ທ່ານຈ້າວເຄີ້ຈື້ຢືນຢັນວ່າ: ຈີນໃຫ້ຄວາມສຳຄັນສູງຕໍ່ການຂະຫຍາຍສາຍພົວພັນຈີນ-ມຽນມາ ແລະເດັດດ່ຽວສະໜັບສະໜູນມຽນມາໃນການທຳຄວາມພະຍາຍາມເພື່ອຮັກສາຄວາມໝັ້ນຄົງແລະສະຖຽນລະພາບຂອງຊາດ, ຈີນຍິນດີຮ່ວມກັບມຽນມາຈັດຕັ້ງປະຕິບັດຄວາມເປັນເອກະພາບກັນທີ່ຜູ້ນຳສອງປະເທດຕົກລົງຮ່ວມກັນ, ເພີ່ມທະວີການຮ່ວມມືເພື່ອຊຸກຍູ້ສາຍພົວພັນຄູ່ຮ່ວມມືຍຸດທະສາດຮອບດ້ານຈີນ-ມຽນມາໃຫ້ຂະຫຍາຍຕົວຂຶ້ນສູ່ລະດັບໃໝ່ຢ່າງບໍ່ຢຸດຢັ້ງ.
ທ່ານວິນມິນແລະທ່ານນາງອ໋ອງຊານຊູຈີໄດ້ສະແດງຄວາມຂອບໃຈຕໍ່ທ່ານປະທານສີຈິ້ນຜິງແລະລັດຖະບານຈີນທີ່ໄດ້ໃຫ້ຄວາມສຳຄັນສູງຕໍ່ສາຍພົວພັນມຽນມາ-ຈີນແລະໃຫ້ການສະໜັບສະໜູນອັນປະເສີດຕໍ່ຂະບວນການສັນຕິພາບມຽນມາກໍຄືການພັດທະນາເສດຖະກິດສັງຄົມມຽນມາ ແລະຫວັງຈະຊຸກຍູ້ການຮ່ວມມືກໍ່ສ້າງໂຄງການ "ໜຶ່ງແລວໜຶ່ງເສັ້ນທາງ"ເຊັ່ນ ແລວເສດຖະກິດມຽນມາ-ຈີນແລະອື່ນໆໃຫ້ໄດ້ຮັບປະສິດທິຜົນຕື່ມອີກ, ລົງເລິກການຮ່ວມມືໃນຂົງເຂດປະຕິບັດກົດໝາຍແລະຮັກສາຄວາມໝັ້ນຄົງ, ຊຸກຍູ້ສາຍພົວພັນມຽນມາ-ຈີນໃຫ້ຂະຫຍາຍຕົວຢ່າງບໍ່ຢຸດຢັ້ງ.
ໃນວັນດຽວກັນ,ຢູ່ນະຄອນຫຼວງເນປີດໍ, ທ່ານຈ້າວເຄີ້ຈື້ຍັງໄດ້ພົບປະກັບທ່ານມິນອອງໄລ ຜູ້ບັນຊາການໃຫຍ່ກອງທັບປ້ອງກັນຊາດມຽນມາອີກດ້ວຍ.
1 2 3 
