4ເດືອນທຳອິດຂອງປີນີ້ ການຄ້າກັບຕ່າງປະເທດຂອງຈີນຂະຫຍາຍຕົວຢ່າງໝັ້ນທ່ຽງ
2018-05-10 16:51:58 cri
ທ່ານກ່າວເຟິ່ງ ໂຄສົກກະຊວງການຄ້າຈີນເປີດເຜີຍໃນກອງປະຊຸມຖະແຫຼງຂ່າວທີ່ຈັດຂຶ້ນໃນວັນທີ 10 ພຶດສະພານີ້ວ່າ: ແຕ່ເດືອນມັງກອນຫາເດືອນເມສາຜ່ານມາ, ການຄ້າກັບຕ່າງປະເທດຂອງຈີນຂະຫຍາຍຕົວເປັນຢ່າງດີແລະໝັ້ນທ່ຽງ, ຄາດວ່າ ໝົດປີ 2018 ນີ້ຈະສາມາດຮັກສາທ່ວງທ່ານີ້ໄດ້ເປັນຢ່າງດີ.
ຕາມສະຖິຕິຈາກດ່ານພາສີຈີນ,ແຕ່ເດືອນມັງກກອນຫາເດືອນເມສາຜ່ານມາ,ຍອດມູນຄ່າການຄ້າກັບຕ່າງປະເທດຂອງຈີນບັນລຸເຖິງ 9110 ຕື້ຢວນ, ເພີ່ມຂຶ້ນ 8,9% ເມື່ອທຽບໃສ່ໄລຍະດຽວກັນຂອງປີຜ່ານມາ ເຊິ່ງຕົ້ນຕໍໄດ້ຮັບຜົນປະໂຫຍດຈາກເສດຖະກິດໂລກເຕີບໂຕຄືນ, ຄວາມຕ້ອງການຂອງຕະຫຼາດສາກົນເພີ່ມຂຶ້ນຢ່າງບໍ່ຢຸດຢັ້ງ, ຂະນະດຽວກັນ, ການທີ່ຈີນລົງເລິກຊຸກຍູ້ການປະຕິຮູບໂຄງປະກອບດ້ານການສະໜອງໃນຂົງເຂດການຄ້າກັບຕ່າງປະເທດ ເຊິ່ງເຮັດໃຫ້ຄວາມຕ້ອງການຂອງຕະຫຼາດພາຍໃນແລະຄວາມຕ້ອງການບໍລິໂພກພາຍໃນປະເທດໄດ້ເພີ່ມຂຶ້ນຢ່າງບໍ່ຢຸດຢັ້ງ.
ສິ່ງທີ່ໜ້າສົນໃຈນັ້ນຄື ແຕ່ເດືອນມັງກອນຫາເດືອນເມສາຜ່ານມາ, ຈີນໄດ້ປຽບດຸນການຄ້າ 506ຕື້ 240 ລ້ານຢວນ, ຫຼຸດລົງ 24,1%, ທ່ານກ່າວເຟິ່ງກ່າວຕື່ມວ່າ: ຈີນໄດ້ກ່າວເນັ້ນມາຫຼາຍເທື່ອແລ້ວວ່າ:ແຕ່ໃດມາຈີນບໍ່ເຄີຍຕັ້ງໃຈສະແຫວງຫາການໄດ້ປຽບດຸນການຄ້າຈັກເທື່ອ, ສະພາບໄດ້ປຽບເກີນດຸນການຄ້າໃນປັດຈຸບັນແມ່ນເກີດຂຶ້ນຍ້ອນຕະຫຼາດ ແລະກໍຈະປ່ຽນແປງໄປຕາມການຜັນແປຂອງຕະຫຼາດເຊັ່ນກັນ.
