ອາເມລິກາປະກາດຂວ້ຳບາດຕໍ່ອີຣານຮອບໃໝ່
2018-05-11 15:01:02 cri
ຫຼັງຈາກທ່ານໂດນັນ ທຣຳ ປະທານາທິບໍດີອາເມລິກາໄດ້ປະກາດວ່າອາເມລິກາໄດ້ຖອນອອກຈາກສັນຍານິວເຄຼຍອີຣານ ແລະຈາກນັ້ນມາສອງມື້ ຄື ວັນທີ 10 ພຶດສະພານີ້,ກະຊວງການເງິນອາເມລິກາກໍປະກາດຂວ້ຳບາດຕໍ່ປະເທດອີຣານຮອບໃໝ່.
ເທື່ອນີ້ໄດ້ຂວ້ຳບາດບຸກຄົນອີຣານ 6 ຄົນ ແລະບໍລິສັດ 3 ແຫ່ງ ເຊິ່ງໄດ້ອາຍັດຊັບສິນຂອງເຂົາໃນປະເທດອາເມລິກາ ແລະຫ້າມພົນລະເມືອງອາເມລິກາພົວພັນດ້ານການຄ້າກັບບຸກຄົນ ຫຼື ບໍລິສັດດັ່ງກ່າວ.
ກະຊວງການເງິນອາເມລິກາໄດ້ອອກຖະແຫຼງການໃນວັນດັ່ງກ່າວວ່າ: ບຸກຄົນ ແລະບໍລິສັດທີ່ຖືກຂວ້ຳບາດດັ່ງກ່າວໄດ້ໂອນເງິນຫຼາຍກວ່າ 1 ລ້ານໂດລາສະຫະລັດໃຫ້ກອງທັບປະຕິວັດອິດສະລາມອີຣານໂດຍຜ່ານສຳນັກງານທີ່ຕັ້ງຢູ່ອາຣັບເອມີເຣດ, ແລະທຶນຈຳນວນນີ້ກໍຖືກສົ່ງໃຫ້ກຸ່ມກໍ່ການຮ້າຍຢູ່ເຂດຕາເວັນອອກກາງ. ກະຊວງການເງິນອາເມລິກາກ່າວວ່າ: ທະນາຄານກາງອີຣານໄດ້ຊ່ວຍເຫຼືອບຸກຄົນ ແລະບໍລິສັດທີ່ຖືກຂວ້ຳບາດໃນການໂອນທຶນ.
