ເຈົ້າໜ້າທີ່ຕຳຫຼວດໄທຢຶດຢາເສບຕິດທີ່ມີມູນຄ່າເຖິງ 1 ຕື້ບາດ
2018-05-14 16:48:03 cri
ສື່ມວນຊົນໄທລາຍງານໃນວັນທີ 12 ພຶດສະພານີ້ວ່າ, ຫວ່າງມໍ່ໆມານີ້, ເຈົ້າໜ້າທີ່ຕຳຫຼວດໄທໄດ້ລັດສະກັດລົດທີ່ຕ້ອງສົງໄສ 4 ຄັນຢູ່ນະຄອນຫຼວງບາງກອກ, ແລະຍຶດຢາບ້າໄດ້ 10 ລ້ານເມັດ, ຢາໄອສ໌ເກືອບ 400 ກິໂລ, ປືນສັ້ນ 2 ບອກ ແລະສິ່ງຜິດກົດໝາຍອື່ນໆ ເຊິ່ງລວມມູນຄ່າເຖິງ 1 ຕື້ບາດ.
ກົມຕຳຫຼວດແຫ່ງຊາດໄທກ່າວວ່າ, ການເຄື່ອນໄຫວໃນຄັ້ງນີ້ສາມາດຈັບຕົວຜູ້ຕ້ອງສົງໄສໄດ້ 6 ຄົນ, ເຂົາເຈົ້າໄດ້ຖືກສົງໄສວ່າມີສ່ວນກ່ຽວຂ້ອງກັບການຮັບເງິນຈາກຜູ້ຄ້າຂາຍຢາເສບຕິດ 6 ໝື່ນຫາ 3 ແສນບາດ,ແລ້ວຮັບຜິດຊອບຂົນສົ່ງຢາເສບຕິດໄປຮອດບ່ອນທີ່ນັດໝາຍໄວ້. ຕຳຫຼວດໄທກຽມຈະຮ້ອງຟ້ອງເຂົາເຈົ້າຕໍ່ສານໃນຂໍ້ຫາມີຢາເສບຕິດໄວ້ໃນຄອບຄອງຢ່າງຜິດກົດໝາຍ,ຖືປືນຢູ່ສະຖານທີ່ສາທາລະນະໂດຍບໍ່ໄດ້ຮັບການອະນຸຍາດແລະໂທດອື່ນໆ. ປັດຈຸບັນ, ຄະດີດັ່ງກ່າວຍັງຢູ່ໃນການສືບສວນຕື່ມອີກ.
ໃນຊຸມປີຜ່ານມາ, ເຖິງວ່າໄທໄດ້ເລັ່ງລັດປາບປາມຜູ້ກໍ່ອາຊະຍາກຳດ້ານຢາເສບຕິດກໍ່ຕາມ,ແຕ່ສະພາບດັ່ງກ່າວຍັງມີຄວາມເຄັ່ງຕຶງຄືເກົ່າ. ຕາມສະຖິຕິຈາກຄະນະກຳມະການປາບປາມຢາເສບຕິດຂອງໄທສະແດງໃຫ້ເຫັນວ່າ, ປີ 2017, ຕຳຫຼວດແລະທະຫານໄທໄດ້ຊຳລະຄະດີການຄ້າຂາຍຢາເສບຕິດຢູ່ທົ່ວປະເທດປະມານ 260.000 ຄະດີ.
