ປະທານາທິບໍດີຝຣັ່ງເນັ້ນຖານະຂອງເຢລູຊາເລັມຕ້ອງໃຫ້ປາແສັລຕິນແລະອິສຣາແອນເປັນຜູ້ຕັດສິນ
2018-05-15 15:16:37 cri
ວັນທີ 14 ພຶດສະພານີ້, ທ່ານ ເອັມມານູແອນ ມາຄຼົງ ປະທານາທິບໍດີຝຣັ່ງໄດ້ກ່າວປະນາມຕໍ່ການກະທຳດ້ວຍຄວາມຮຸນແຮງຂອງກອງທັບອິສຣາແອນທີ່ຍິງໃສ່ປະຊາຊົນປາແລັສຕິນທີ່ປະທ້ວງຕໍ່ການຍ້າຍສະຖານທູດອາເມລິກາປະຈຳອິສຣາແອນໄປເຢລູຊາເລັມ ພ້ອມທັງກ່າວວ່າບັນຫາຖານະເຢລູຊາເລັມຕ້ອງໄດ້ຮັບການແກ້ໄຂຈາກອິສຣາແອນແລະປາແລັສຕິນເທົ່ານັ້ນ.
ທຳນຽບປະທານາທິບໍດີຝຣັ່ງໄດ້ເປີດເຜີຍບົດຖະແຫຼງຂ່າວໃນວັນທີ 14 ພຶດສະພານີ້ ໂດຍກ່າວວ່າ, ຝຣັ່ງບໍ່ເຫັນດີນຳການຕົກລົງຂອງອາເມລິກາທີ່ຈະສ້າງຕັ້ງສະຖານທູດຢູ່ເຢລູຊາເລັມ. ຖານະຂອງເຢລູຊາເລັມຕ້ອງໄດ້ຮັບການຕັດສິນຈາກຝ່າຍທີ່ກ່ຽວຂ້ອງໂດຍຜ່ານການເຈລະຈາພາຍໃຕ້ການສະໜັບສະໜູນຈາກປະຊາຄົມໂລກ. ທ່ານ ມາຄຼົງ ໄດ້ຢ້ຳຫຼັກໝັ້ນຂອງລັດຖະບານຝຣັ່ງມາໂດຍຕະຫຼອດໃນການສະໜັບສະໜູນການຢູ່ຮ່ວມກັນໂດຍສັນຕິລະຫວ່າງອິສຣາແອນ-ປາແສັລຕິນ.
ກ່ອນໜ້ານີ້, ທ່ານ ຊ໋ອງອິຟເລີເດຣນ ລັດຖະມົນຕີກະຊວງການຕ່າງປະເທດຝຣັ່ງໄດ້ອອກຖະແຫຼງການ ໂດຍໄດ້ຮຽກຮ້ອງໃຫ້ລັດຖະບານອິສຣາແອນຮັກສາຄວາມໃຈເຢັນແລະຄວາມອົດກັ້ນໄວ້,ແລະຄວນໃຊ້ກຳລັງປະກອບອາວຸດຢ່າງເໝາະສົມ. ຖະແຫຼງການກ່າວຢ້ຳວ່າ, ປະຊາຊົນປາແລັສຕິນມີສິດຈັດການເຄື່ອນໄຫວປະທ້ວງໂດຍສັນຕິ ແລະຕ້ອງປ້ອງກັນຄວາມປອດໄພຂອງປະຊາຊົນໂດຍສະເພາະແມ່ນຜູ້ທີ່ມີອາຍຸບໍ່ເຕັມກະສຽນ.
