ປະທານສະພາການຄ້າອາເມລິກາກ່າວວ່າ: ສອງຝ່າຍຈີນແລະອາເມລິກາຍັງມີໂອກາດຮັບຜົນປະໂຫຍດຫຼາຍກວ່າເກົ່າ
2018-05-16 14:52:16 cri
ກອງປະຊຸມເຈລະຈາອະດີດເຈົ້າໜ້າທີ່ອາວຸໂສແລະຜູ້ນຳອຸດສາຫະກຳການຄ້າຈີນ-ອາເມລິກາຄັ້ງທີ 10 ໄດ້ຈັດຂຶ້ນຢູ່ນະຄອນຫຼວງປັກກິ່ງໃນວັນທີ 15 ພຶດສະພານີ້.
ທ່ານ ໂທມັສ ໂດໂນຮຸຍ ປະທານສະພາການຄ້າອາເມລິກາກ່າວໃນກອງປະຊຸມວ່າ,ພວກຂ້າພະເຈົ້າໄດ້ປະຕິເສດນະໂຍບາຍສອງຝ່າຍທີ່ພຽງແຕ່ສຸມໃສ່ແກ້ໄຂສະພາບການຂາດດຸນການຄ້າເທົ່ານັ້ນ. ເພື່ອປົກປ້ອງກຳມະກອນ,ຜູ້ບໍລິໂພກແລະບໍລິສັດຂອງປະເທດຕົນ,ໄດ້ໃຊ້ມາດຕະການຈຳກັດຕໍ່ຈີນ,ພັດຈະກະທົບຕໍ່ຜົນປະໂຫຍດຂອງອາເມລິກາ,ການກະທຳເຫຼົ່ານີ້ບໍ່ມີຄວາມໝາຍຫຍັງ. ສິ່ງສຳຄັນໃນປັດຈຸບັນຄວນເປີດຕະຫຼາດ,ຜ່ອນຄາຍເງິນອຸດໜູນ,ຍົກເລີກວິທີຕິດຕາມຄຸ້ມຄອງທີ່ບໍ່ເປັນປະໂຫຍດຕໍ່ການແຂ່ງຂັນ. ເຖິງວ່າຍັງຜະເຊີນກັບສິ່ງທ້າທາຍແລະຄວາມຫຍຸ້ງຍາກຈຳນວນໜຶ່ງລະຫວ່າງຈີນ-ອາເມລິກາກໍ່ຕາມ,ແຕ່ນີ້ບໍ່ໝາຍຄວາມວ່າພວກເຮົາບໍ່ສາມາດບັນລຸການເຊັນສັນຍາແບບຕ່າງຝ່າຍຕ່າງມີຜົນປະໂຫຍດ. ພວກເຮົາຍັງມີໂອກາດໃຫ້ສອງຝ່າຍສາມາດຮັບຜົນປະໂຫຍດໃຫ້ໄດ້ຫຼາຍກວ່າເກົ່າ.
ຂ່າວແຈ້ງຕື່ມວ່າ, ກອງປະຊຸມຄັ້ງນີ້ໄດ້ດຶງດູດຜູ້ຕາງໜ້າການນຳອຸດສາຫະກຳການຄ້າ,ອະດີດເຈົ້າໜ້າທີ່ອາວຸໂສຂອງລັດຖະບານກໍ່ຄືຊ່ຽວຊານແລະນັກວິຊາການຂອງຈີນແລະອາເມລິກາທັງໝົດ 22 ທ່ານ ໂດຍຈະດຳເນີນການເຈລະຈາກ່ຽວກັບຫົວຂໍ້ຕ່າງໆເຊັ່ນ: ທິດທາງນະໂຍບາຍແລະການເຄື່ອນໄຫວໃນອະນາຄົດລະຫວ່າງຈີນ-ອາເມລິກາ,ໜຶ່ງແລວໜຶ່ງເສັ້ນທາງ,ເສດຖະກິດດີຈີຕ໋ອນ,ອຸດສາຫະກຳວິທະຍາສາດເຕັກນິກໂລກແລະຫົວຂໍ້ອື່ນໆ.
