ທ່ານປູຕິນຢືນຢັນວ່າ ກຳລັງປະກອບອາວຸດຕ່າງປະເທດຈະຖອນອອກຈາກຊີຣີ
2018-05-18 11:28:10 cri
ຂ່າວສານຈີນລາຍງານວ່າ: ວັນທີ 17 ພຶດສະພານີ້, ທ່ານວລາດີເມຍ ປູຕິນ ປະທານາທິບໍດີຣັດເຊຍຢືນຢັນວ່າ ກຳລັງປະກອບອາວຸດຕ່າງປະເທດຈະຖອນອອກຈາກຊີຣີ.
ວັນດຽວກັນ, ທ່ານປູຕິນໄດ້ພົບປະກັບທ່ານບາຊາ ອັນອາຊັດ ປະທານາທິບໍດີຊີຣີທີ່ມາຢ້ຽມຢາມຢູ່ເມືອງໂຊຊີ ພາກໃຕ້ຣັດເຊຍ. ໃນຖະແຫຼງການທີ່ເປີດເຜີຍຫຼັງການພົບປະສອງຝ່າຍ, ທ່ານປູຕິນລະບຸວ່າ:ປັດຈຸບັນ,ກອງທັບຊີຣີສາມາດຍາດໄດ້ຜົນສຳເລັດທີ່ພົ້ນເດັ່ນໃນການຕ້ານການກໍ່ການຮ້າຍ ແລະຂະບວນການການເມືອງພາຍໃນປະເທດຊີຣີກໍໄດ້ເລີ່ມຂຶ້ນແລ້ວ, ດ້ວຍເຫດນີ້,ກຳລັງປະກອບອາວຸດຕ່າງປະເທດຈະຖອນອອກຈາກຊີຣີ.
ທ່ານປູຕິນຢືນຢັນວ່າ, ຣັດເຊຍແລະຊີຣີສາມາດຮ່ວມກັນປະຕິບັດວຽກງານໃນໄລຍະຕໍ່ໄປ ຄືຟື້ນຟູເສດຖະກິດຊີຣີ ທັງຊ່ວຍເຫຼືອຊາວອົບພະຍົບໃນດ້ານມະນຸດສະທຳອີກດ້ວຍ.
