ໂຄສົກກະຊວງປ້ອງກັນປະເທດຈີນຕອບຄຳຖາມຂອງນັກຂ່າວກ່ຽວກັບການປະທະກັນດ້ວຍກຳລັງອາວຸດຢູ່ພາກເໜືອມຽນມາ
2018-05-19 14:34:23 cri
ຫວ່າງມໍ່ໆມານີ້, ການປະທະກັນດ້ວຍກຳລັງອາວຸດທີ່ເກີດຂຶ້ນຢູ່ພາກເໜືອມຽນມາໄດ້ເຮັດໃຫ້ປະຊາຊົນຈີນຢູ່ມຽນມາປະສົບຄວາມເສຍຫາຍທາງດ້ານຊີວິດແລະຊັບສິນ. ຕອນຄ່ຳວັນທີ 18 ພຶດສະພານີ້, ທ່ານ ອຸຊ່ຽນ ໂຄສົກກະຊວງປ້ອງກັນປະເທດຈີນໄດ້ແຈ້ງຫຼັກໝັ້ນຂອງກອງທັບຈີນແລະມາດຕະການຮັບມື.
ທ່ານ ອຸຊ່ຽນ ກ່າວວ່າ, ມາຮອດປັດຈຸບັນ, ໄດ້ມີປະຊາຊົນຈີນຢູ່ມຽນມາເສຍຊີວິດ 3 ຄົນ,ແລະໄດ້ມີຈະຫຼວດ 3 ລູກແລະລູກຫຼົງຈຳນວນໜຶ່ງຕົກໃສ່ແດນຈີນ. ກອງທັບຈີນໄດ້ໃຫ້ຄວາມສຳຄັນສູງຕໍ່ເລື່ອງນີ້,ແລະໄດ້ໃຊ້ມາດຕະການທີ່ເຂັ້ມແຂງເພື່ອເພີ່ມທະວີການລາດຕະເວນ, ຄຸ້ມຄອງ-ຄວບຄຸມແລະປ້ອງກັນຄວາມປອດໄພຢູ່ເຂດຊາຍແດນຈີນ-ມຽນມາ,ພ້ອມທັງຕໍ່ວ່າທັກທ້ວງຢ່າງເຄັ່ງຂຶມຕໍ່ຝ່າຍທີ່ກ່ຽວຂ້ອງຂອງມຽນມາອີກດ້ວຍ.
ທ່ານ ອຸຊ່ຽນ ກ່າວຕື່ມວ່າ, ພວກຂ້າພະເຈົ້າໄດ້ຮຽກຮ້ອງໃຫ້ຝ່າຍຕ່າງໆທີ່ປະທະກັນຈົ່ງຮັກສາຄວາມອົດກັ້ນໄວ້,ຢຸດຍິງໃນທັນທີ ແລະໃຊ້ມາດຕະການທີ່ມີປະສິດທິຜົນເພື່ອປ້ອງກັນບໍ່ໃຫ້ເກີດເຫດການທີ່ຄ້າຍຄືກັນນີ້ອີກ.
