ອີຢູກ່າວວ່າສັນຍານິວເຄລຍອີຣານບໍ່ມີຫຍັງເຂົ້າແທນໄດ້
2018-05-22 16:18:45 cri
ວັນທີ 21 ພຶດສະພານີ້, ທ່ານນາງ ເຟເດຣິຄາ ໂມເກຣິນີ ຜູ້ຕາງໜ້າຂັ້ນສູງນະໂຍບາຍການຕ່າງປະເທດແລະຄວາມໝັ້ນຄົງຂອງສະຫະພາບເອີຣົບ ໄດ້ຕຳໜິຄຳປາຖະກະຖາຂອງທ່ານ ໄມຄ໌ ພົມເພວ ລັດຖະມົນຕີກະຊວງການຕ່າງປະເທດອາເມລິກາກ່ຽວກັບອີຣານ ໂດຍເນັ້ນວ່າ, ສັນຍານິວເຄລຍອີຣານຮອບດ້ານ ບໍ່ມີຫຍັງເຂົ້າແທນໄດ້.
ທ່ານໄດ້ຢ້ຳເຖິງຫຼັກໝັ້ນຂອງສະຫະພາບເອີລົບໃນສັນຍາດັ່ງກ່າວຄື: ຂໍພຽງແຕ່ອີຣານປະຕິບັດຕາມຄຳໝັ້ນສັນຍາກ່ຽວກັບນິວເຄລຍແລ້ວ, ສະຫະພາບເອີລົບ ຈະສືບຕໍ່ປະຕິບັດຕາມສັນຍາດັ່ງກ່າວຢ່າງຄົບຖ້ວນແລະບັງເກີດຜົນ.
ວັນທີ 21 ພຶດສະພານີ້, ທ່ານ ພົມເພວ ລັດຖະມົນຕີການຕ່າງປະເທດອາເມລິກາ ໄດ້ກ່າວປາຖະກະຖາຢູ່ມູນນິທິມໍລະດົກ ເຊິ່ງເປັນຄັງປັນຍາຂອງອາເມລິກາວ່າ, ຖ້າຫາກອີຣານບໍ່ປ່ຽນແປງແນວທາງໃນປັດຈຸບັນ, ຈະຖືກອາເມລິກາຂວ້ຳບາດຢ່າງເຂັ້ມງວດທີ່ສຸດ. ແລະທ່ານ ພົມເພວ ຍັງໄດ້ສະເໜີຄຳຮຽກຮ້ອງ 12 ຂໍ້ຕໍ່ອີຣານ ເພື່ອເປັນເງື່ອນໄຂໃນການຢຸດຕິການຂວ້ຳບາດ.
