ປະທານາທິບໍດີອາເມລິກາກ່າວວ່າ ອາດຈະເລື່ອນເວລາຂອງການພົບປະລະຫວ່າງຜູ້ນຳອາເມລິກາ-ສປປ ເກົາຫຼີ
2018-05-23 11:12:37 cri
ວັນທີ 22 ພຶດສະພານີ້, ທ່ານ ໂດນັນ ທຣຳ ປະທານາທິບໍດີອາເມລິກາກ່າວວ່າ, ອາດຈະເລື່ອນເວລາຂອງການພົບປະລະຫວ່າງທ່ານກັບທ່ານ ກິມເຈີງອູນ ຜູ້ນຳສູງສຸດຂອງ ສປປ ເກົາຫຼີ.
ໃນມື້ດັ່ງກ່າວ, ຢູ່ທຳນຽບຂາວ ທ່ານ ໂດນັນ ທຣຳ ໄດ້ຮ່ວມກັບທ່ານ ມູນເຈອິນ ປະທານາທິບໍດີ ສ.ເກົາຫຼີ ທີ່ໄປຢ້ຽມຢາມອາເມລິກາໃຫ້ສຳພາດຕໍ່ນັກຂ່າວວ່າ, ການພົບປະລະຫວ່າງທ່ານ ໂດນັນ ທຣຳ ກັບ ທ່ານ ກິມເຈີງອູນ ອາດຈະບໍ່ຈັດຂຶ້ນໃນວັນທີ 12 ມິຖຸນາໜ້ານີ້, ອາດຈະເລື່ອນເວລາຕາມຫຼັງ ປະຈຸບັນພວມຢູ່ໃນການຕິດຕໍ່ພົວພັນຢູ່. ທ່ານກ່າວຕື່ມວ່າ, ອາເມລິກາໄດ້ສະເໜີເງື່ອນໄຂຂອງການພົບປະ, ຖ້າຄວາມຕ້ອງການຂອງອາເມລິກາບໍ່ສາມາດໄດ້ຮັບການຕອບສະໜອງ ການພົບປະກໍ່ຈະບໍ່ຈັດຂຶ້ນ.
ທ່ານ ກິມກຸຍກວນ ຮອງລັດຖະມົນຕີກະຊວງການຕ່າງປະເທດ ສປປ ເກົາຫຼີ ຜູ້ທີ 1 ໄດ້ກ່າວຄຳປາໄສໃນວັນທີ 16 ພຶດສະພານີ້ວ່າ, ກ່ອນໜ້ານີ້, ທ່ານ ຈອນ ໂບນຕັນ ຜູ້ຊ່ວຍວຽກງານດ້ານຄວາມໝັ້ນຄົງແຫ່ງຊາດຂອງປະທານາທິບໍດີອາເມລິກາໄດ້ມີຈຸດຢືນໃຫ້ໃຊ້ "ຮູບແບບການປອດນິວເຄລຍຂອງລີບີ"ແລະຈຸດຢືນອື່ນໆບົນຫຼັກການ "ປອດນິວເຄລຍກ່ອນ ຊົດເຊີຍຕາມຫຼັງ",ເຊິ່ງນີ້ບໍ່ເຈດຈຳນົງແກ້ໄຂບັນຫາໂດຍຜ່ານການເຈລະຈາ,ຫາກແມ່ນປ່ຽນຊາຕາກຳຂອງ ສປປ ເກົາຫຼີ ໃຫ້ຄ້າຍຄືກັບລີບີຫຼືອີຣັກທີ່ໄດ້ແຕກສະຫຼາຍຍ້ອນໄດ້ມອບຕົນເອງໃຫ້ແກ່ປະເທດໃຫຍ່ຢ່າງເຖິງຖອງ. ຖ້າລັດຖະບານໂດນັນ ທຣຳຢາກບັງຄັບໃຫ້ ສປປ ເກົາຫຼີ ປອດນິວເຄລຍພຽງຝ່າຍດຽວ, ສປປ ເກົາຫຼີ ອາດຈະພິຈາລະນາຄືນໃໝ່ກ່ຽວກັບການຈະເຂົ້າຮ່ວມການພົບປະຜູ້ນຳ ສປປ ເກົາຫຼີ-ອາເມລິກາຫຼືບໍ່.
