ທ່ານ ວາງຢີ້ ກ່າວກ່ຽວກັບການພົບປະຜູ້ນຳອາເມລິກາ-ສປປ ເກົາຫຼີ ວ່າ: ຖ້າຢາກກຳສັນຕິພາບ,ປັດຈຸບັນກໍ່ມີໂອກາດ
2018-05-24 11:39:32 cri
ຕາມຂ່າວCRI: ວັນທີ 23 ພຶດສະພານີ້ຕາມເວລາທ້ອງຖິ່ນ, ທ່ານ ວາງຢີ້ ທີ່ປຶກສາແຫ່ງລັດທັງເປັນລັດຖະມົນຕີກະຊວງການຕ່າງປະເທດຈີນໄດ້ສິ້ນສຸດການຢ້ຽມຢາມອາກຊັງຕິນແລະກັບຄືນປະເທດ ແລະໄດ້ພົບປະກັບທ່ານ ໄມຄ໌ ພົມເພວ ລັດຖະມົນຕີກະຊວງການຕ່າງປະເທດອາເມລິກາໃນເວລາເດີນທາງແວ່ວໍຊິງຕັນ. ສອງຝ່າຍໄດ້ຮ່ວມກັນໃຫ້ສຳພາດຕໍ່ນັກຂ່າວຫຼັງສິ້ນສຸດການພົບປະ.
ທ່ານ ວາງຢີ້ ກ່າວວ່າ, ຂ້າພະເຈົ້າແລະທ່ານລັດຖະມົນຕີການຕ່າງປະເທດ ໄມຄ໌ ພົມເພວ ໄດ້ແລກປ່ຽນຄວາມຄິດຄວາມເຫັນກັນກ່ຽວກັບບັນຫານິວເຄລຍແຫຼມເກົາຫຼີທີ່ບັນດາຝ່າຍສົນໃຈທີ່ສຸດໃນປັດຈຸບັນ. ຂ້າພະເຈົ້າໄດ້ຮັບຟັງການວິເຄາະແລະຄຳເຫັນຂອງທ່ານຕໍ່ສະຖານະການ. ຂ້າພະເຈົ້າຢາກບອກໃຫ້ພວກທ່ານຮູ້ວ່າ:
ທຳອິດ,ຈີນເດັດດ່ຽວສຸມໃສ່ບັນລຸການປອດນິວເຄລຍແຫຼມເກົາຫຼີ, ແລະຫຼັກໝັ້ນດັ່ງກ່າວຈະບໍ່ປ່ຽນແປງຢ່າງເດັດຂາດ.
ສອງ,ຈີນເດັດດ່ຽວສະໜັບສະໜູນຈັດການພົບປະລະຫວ່າງຜູ້ນຳອາເມລິກາ-ສປປ ເກົາຫຼີ.
ສາມ,ຈີນເດັດດ່ຽວປະຕິບັດພັນທະໜ້າທີ່ສາກົນຂອງຕົນ,ພວກຂ້າພະເຈົ້າຈະສືບຕໍ່ປະຕິບັດມະຕິຕ່າງໆທີ່ກ່ຽວຂ້ອງກັບ ສປປ ເກົາຫຼີ ຂອງສະພາຄວາມໝັ້ນຄົງສະຫະປະຊາຊາດຢ່າງຮອບດ້ານແລະເຂັ້ມງວດ,ພະຍາຍາມປົກປັກຮັກສາສັນຕິພາບແລະສະຖຽນລະພາບຂອງແຫຼມເກົາຫຼີ.
ທ່ານ ວາງຢີ້ ກ່າວເນັ້ນວ່າ, ການພົບປະລະຫວ່າງຜູ້ນຳອາເມລິກາ-ສປປ ເກົາຫຼີ ໄດ້ມີພື້ນຖານທີ່ດີ. ຖ້າອາເມລິກາຢາກແກ້ໄຂບັນຫາ,ປັດຈຸບັນກໍ່ມີໂອກາດ; ຖ້າຢາກກຳສັນຕິພາບ,ປັດຈຸບັນກໍ່ມີໂອກາດ; ຖ້າຢາກສ້າງປະຫວັດສາດ,ປັດຈຸບັນກໍ່ມີໂອກາດເຊັ່ນດຽວກັນ.
