ອາເມລິກາປະກາດຂັບໄລ່ເຈົ້າໜ້າທີ່ການທູດເວເນຊູເອລາ 2 ຄົນ
2018-05-24 16:26:43 cri
ວັນທີ 23 ພຶດສະພານີ້, ກະຊວງການຕ່າງປະເທດອາເມລິກາກ່າວວ່າ, ເພື່ອເປັນການຕອບໂຕ້ຕໍ່ເວເນຊູເອລາທີ່ຂັບໄລ່ເຈົ້າໜ້າທີ່ການທູດປະເທດຕົນ 2 ຄົນເມື່ອກ່ອນໜ້ານີ້ບໍ່ດົນ, ປະເທດຕົນປະກາດວ່າ ເຈົ້າໜ້າທີ່ການທູດເວເນຊູເອລາ 2 ຄົນເປັນ "ຄົນທີ່ບໍ່ຖືກຍອມຮັບ" ແລະຮຽກຮ້ອງໃຫ້ 2 ຄົນນີ້ອອກຈາກອາເມລິກາພາຍໃນ 48 ຊົ່ວໂມງ.
ທ່ານ ຮັດເທີ ໂນເອີດທ ໂຄສົກກະຊວງການຕ່າງປະເທດອາເມລິກາຖະແຫຼງໃນຕອນຄ່ຳມື້ດັ່ງກ່າວວ່າ, ເພື່ອເປັນການຕອບໂຕ້ຕໍ່ການກະທຳທາງການທູດທີ່ບໍ່ທ່ຽງທຳຂອງລັດຖະບານເວເນຊູເອລາທີ່ນຳໂດຍທ່ານ ມາດູໂຣ, ປະເທດຕົນໄດ້ປະກາດວ່າ, ອຸປະທູດຂອງສະຖານທູດເວເນຊູເອລາປະຈຳອາເມລິກາ ແລະ ຮອງກົງສຸນໃຫຍ່ຂອງສະຖາກົງສຸນໃຫຍ່ເວເນຊູເອລາປະຈຳຮິວສ໌ຕັນ ເປັນ "ຄົນທີ່ບໍ່ຖືກຍອມຮັບ" ແລະສັ່ງໃຫ້ອອກຈາກປະເທດຕົນໃນເວລາຈຳກັດ. ທ່ານຖະແຫຼງຕື່ມວ່າ, ເຈົ້າໜ້າທີ່ການທູດອາເມລິກາທີ່ຖືກເວເນຊູເອລາຂັບໄລ່ນັ້ນ ເປັນຄົນທີ່ປະຕິບັດຕາມລະບຽບ ແລະບໍ່ມີການກະທຳທີ່ບໍ່ເໝາະສົມ.
ສາຍພົວພັນລະຫວ່າງເວເນຊູເອລາກັບອາເມລິກາໄດ້ຕົກຢູ່ໃນສະພາບເຄັ່ງຕຶງນັບແຕ່ທ່ານ ຊາເວັສ ຂຶ້ນດຳລົງຕຳແໜ່ງປະທານາທິບໍດີເວເນຊູເອລາເມື່ອປີ 1999 ເປັນຕົ້ນມາ ແລະສອງປະເທດກໍບໍ່ໄດ້ແຕ່ງຕັ້ງເອກອັກຄະລັດຖະທູດໃຫ້ແກ່ກັນນັບແຕ່ເດືອນກໍລະກົດປີ 2010 ເປັນຕົ້ນມາ.
