 |
 |
 |
 |
|
|
|
|
ທ່ານ ດາຕຸກ ເຊຣີ ມາຮາເທຍ ບິນ ໂມຮາເມັດ ນາຍົກລັດຖະມົນຕີມາເລເຊຍ ກ່າວໃນວັນທີ 24 ພຶດສະພານີ້ວ່າ: ລັດຖະບານມາເລເຊຍຈະສືບຕໍ່ສຸມໃສ່ເພີ່ມທະວີການຮ່ວມມືກັບຈີນ ແລະຊຸກຍູ້ການຮ່ວມມືລະຫວ່າງສອງປະເທດໃຫ້ພັດທະນາກ້າວໄປໜ້າ.
ທ່ານມາຮາເທຍ ໄດ້ຕ້ອນຮັບການເຂົ້າຢ້ຽມຄຳນັບຂອງທ່ານປາຍທ່ຽນ ເອກອັກຄະລັດຖະທູດຈີນປະຈຳມາເລເຊຍ ໃນວັນດັ່ງກ່າວ ໂດຍກ່າວວ່າ: ຈີນແມ່ນເພື່ອນມິດທີ່ສະໜິດສະໜົມ ແລະຄູ່ຮ່ວມທີ່ສຳຄັນຂອງມາເລເຊຍມາໂດຍຕະຫຼອດ ລັດຖະບານຊຸດໃໝ່ຂອງມາເລເຊຍຈະສືບຕໍ່ສຸມໃສ່ເພີ່ມທະວີການຮ່ວມມືກັບຈີນຢ່າງຮອບດ້ານ ເຊັ່ນຂົງເຂດການເມືອງ, ເສດຖະກິດການຄ້າ ແລະອື່ນໆ. ໃນຊຸມປີຜ່ານມາ, ເສດຖະກິດຈີນມີການພັດທະນາຢ່າງວ່ອງໄວ, ການກໍ່ສ້າງພື້ນຖານໂຄງລ່າງ ເຊັ່ນ ທາງລົດໄຟ ໄດ້ຮັບໝາກຜົນຢ່າງພົ້ນເດັ່ນ, ລະດັບວິທະຍາສາດ-ເຕັກນິກໃນຂົງເຂດຕ່າງໆ ເຊັ່ນ ກະສິກຳ ກໍມີຄວາມກ້າວໜ້າຢ່າງວ່ອງໄວເຊັ່ນກັນ ແລະ ບົດຮຽນການພັດທະນາ ແລະວິທະຍາສາດ-ເຕັກນິກຂອງຈີນກໍເປັນສິ່ງທີ່ໜ້າຮ່ຳຮຽນແລະຖອດຖອນສຳລັບມາເລເຊຍ ຈາກນີ້ຈຶ່ງເຫັນໄດ້ວ່າ, ການຮ່ວມມືລະຫວ່າງສອງປະເທດຈະມີການພັດທະນາຢ່າງໃຫຍ່ໃນອະນາຄົດ. ມາເລເຊຍຍິນດີຕ້ອນຮັບວິສາຫະກິດຈີນມາລົງທຶນສ້າງທຸລະກິດຢູ່ປະເທດຕົນ ແລະຊຸກຍູ້ການຮ່ວມມືລະຫວ່າງສອງປະເທດໃຫ້ສືບຕໍ່ພັດທະນາກ້າວໄປໜ້າ.
ທ່ານປາຍທ່ຽນ ກ່າວວ່າ: ຈີນຊົມເຊີຍຕໍ່ທ່ານມາຮາເທຍ ທີ່ຫາກໍຂຶ້ນດຳລົງຕຳແໜ່ງ ນາຍົກລັດຖະມົນຕີແລ້ວກໍເປີດເຜີຍທ່າທີຂອງຕົນທີ່ສະໜັບສະໜູນຂໍ້ລິເລີ່ມ "ໜຶ່ງແລວໜຶ່ງເສັ້ນທາງ" ແລະຍິນດີຕ້ອນຮັບວິສາຫະກິດຈີນໄປລົງທຶນຢູ່ມາເລເຊຍ ຈີນຖືເອົາມາເລເຊຍເປັນຄູ່ຮ່ວມມືທີ່ສຳຄັນໃນການຮ່ວມສ້າງເສັ້ນທາງສາຍໄໝທາງທະເລສະຕະວັດທີ 21, ຍິນດີຮ່ວມກັບມາເລເຊຍສ້າງ "ໜຶ່ງແລວໜຶ່ງເສັ້ນທາງ" ແລະ ຮ່ວມກັນສຸມໃສ່ການພັດທະນາ-ຄວາມຈະເລີນຮຸ່ງເຮືອງຂອງສອງປະເທດ ແລະການສ້າງປະຊາຄົມຮ່ວມຊາຕາກຳອາຊີ.
 |
 |
 |