ສປປ ເກົາຫຼີຕອບຮັບຕໍ່ປະທານາທິບໍດີອາເມລິກາທີ່ຍົກເລີກການພົບປະລະຫວ່າງຜູ້ນຳສອງປະເທດ
ວັນທີ 25 ພຶດສະພານີ້, ສປປ ເກົາຫຼີໄດ້ຕອບຮັບຕໍ່ທ່ານໂດນັນ ທຣຳ ປະທານາທິບໍດີອາເມລິກາທີ່ປະກາດຍົກເລີກການພົບປະກັບທ່ານກິມເຈິງອຸນ ຜູ້ນຳສູງສຸດ ສປປ ເກົາຫຼີ ໂດຍກ່າວວ່າ: ການຕົກລົງຂອງອາເມລິກາບໍ່ສອດຄ່ອງກັບຄວາມປາຖະໜາຂອງປະຊາຄົມໂລກທີ່ຫວັງໃຫ້ແຫຼມເກົາຫຼີ ກໍຄືທົ່ວໂລກມີສັນຕິພາບແລະສະຖຽນລະພາບ ແຕ່ ສປປ ເກົາຫຼີຍິນດີຮ່ວມກັບອາເມລິການັ່ງລົງເຈລະຈາກັນຢູ່ທຸກເວລາແລະດ້ວຍຮູບແບບຕ່າງໆ ເພື່ອແກ້ໄຂບັນຫາ.
ທ່ານກິມເກກວານ ຮອງລັດຖະມົນຕີຜູ້ທີໜຶ່ງກະຊວງການຕ່າງປະເທດ ສປປ ເກົາຫຼີ ໄດ້ຕຳນິໂຕ້ຕອບຖ້ອຍຄວາມຂອງທ່ານໂດນັນ ທຣຳ ທີ່ວ່າ ສປປ ເກົາຫຼີ "ໂມໂຫທີ່ສຸດແລະປໍລະປັກຢ່າງເປີດແປນ" ກັບອາເມລິກາ ທີ່ກ່າວໃນຈົດໝາຍເຖິງທ່ານກິມເຈິງອຸນ ໂດຍກ່າວວ່າ: ສະພາບການໃນປັດຈຸບັນໄດ້ພິສູດວ່າ ສອງຝ່າຍຕ້ອງໃຫ້ມີການພົບປະລະຫວ່າງປະມຸກລັດສອງປະເທດໂດຍດ່ວນ ເພື່ອຊຸກຍູ້ການປັບປຸງການພົວພັນໃຫ້ດີຂຶ້ນ. ແນວໃດກໍຕາມ, ສປປ ເກົາຫຼີກໍຕີລາຄາສູງຕໍ່ທ່ານໂດນັນ ທຣຳ ທີ່ໄດ້ຕົກລົງເຂົ້າຮ່ວມກອງປະຊຸມສຸດຍອດອາເມລິກາ- ສປປ ເກົາຫຼີ ແລະພະຍາຍາມຕາມມາ ເຊິ່ງປະທານາທິບໍດີອາເມລິກາທຸກຊຸດຜ່ານມາກໍບໍ່ໄດ້ກະທຳຄືແນວນີ້ ແຕ່ດຽວນີ້ ອາເມລິກາພັດປະກາດຍົກເລີກການພົບປະແຕ່ຝ່າຍດຽວຢ່າງກະທັນຫັນ ເຮັດໃຫ້ ສປປ ເກົາຫຼີຮູ້ສຶກແປກປະຫຼາດ ແລະເສຍດາຍ. ທ່ານກິມເກກວານ ກ່າວຕື່ມວ່າ: ເປົ້າໝາຍ ແລະມານະຈິດຂອງ ສປປ ເກົາຫຼີ ທີ່ພະຍາຍາມທຸກຢ່າງເພື່ອສັນຕິພາບ ແລະສະຖຽນລະພາບຂອງແຫຼມເກົາຫຼີ ກໍຄືຂອງໂລກ ຈະເດັດດ່ຽວບໍ່ປ່ຽນແປງ ແລະຍິນດີໃຫ້ອາເມລິກາມີເວລາແລະໂອກາດ ດ້ວຍທ່າທີທີ່ເປີດກວ້າງ.
