ກອງປະຊຸມເວທີປຶກສາຫາລືຄວາມໝັ້ນຄົງແລະວຽກງານປ້ອງກັນປະເທດຈີນ-ອາຟຣິກາຄັ້ງທຳອິດຈະຈັດຂຶ້ນຢູ່ຈີນໃນທ້າຍເດືອນນີ້
2018-06-01 10:55:45 cri
ທ່ານເຢິນໂກວສຽງ ໂຄສົກກະຊວງປ້ອງກັນປະເທດຈີນ ໄດ້ແຈ້ງໃຫ້ຊາບໃນວັນທີ 31 ພຶດສະພາຜ່ານມາຢູ່ນະຄອນຫຼວງປັກກິ່ງວ່າ: ກະຊວງປ້ອງກັນປະເທດຈີນຈະຈັດກອງປະຊຸມເວທີປຶກສາຫາລືຄວາມໝັ້ນຄົງແລະວຽກງານປ້ອງກັນປະເທດຈີນ-ອາຟຣິກກາຄັ້ງທຳອິດຢູ່ຈີນແຕ່ວັນທີ 26 ມິຖຸນາຫາວັນທີ 10 ກໍລະກົດທີ່ຈະມາເຖິງນີ້ໂດຍຈະເຊື້ອເຊີນຫົວໜ້າຂະແໜງການປ້ອງກັນປະເທດ, ເຈົ້າໜ້າທີ່ອາວຸໂສກອງທັບອາຟຣິກກາກໍຄືຜູ້ຮັບຜິດຊອບຂອງອົງການຈັດຕັ້ງພາກພື້ນເຂົ້າຮ່ວມ.
ກອງປະຊຸມເວທີປຶກສາຫາລືຄັ້ງນີ້ມີຫົວຂໍ້ວ່າ "ເກາະແຂນຮ່ວມມືກັນ,ຮັກສາແລະຊ່ວຍເຫຼືອກັນ", ຕົ້ນຕໍຈະຫາລືບັນຫາຄວາມໝັ້ນຄົງໃນພາກພື້ນ, ການສ້າງຄວາມສາມາດການຮັກສາຄວາມໝັ້ນຄົງຢ່າງເປັນເຈົ້າຕົນເອງຂອງອາຟຣິກກາ, ການຮ່ວມມືດ້ານວຽກງານປ້ອງກັນປະເທດແລະຄວາມໝັ້ນຄົງລະຫວ່າງຈີນ-ອາຟຣິກກາແລະບັນຫາອື່ນໆ, ຜູ້ແທນຈາກຂະແໜງການປ້ອງກັນປະເທດອາຟຣິກກາຈະຢ້ຽມຊົມກອງທັບບົກ,ກອງທັບເຮືອແລະກອງທັບອາກາດຂອງຈີນ.
ທ່ານເຢິນໂກວສຽງກ່າວຕື່ມວ່າ: ເຊື່ອໝັ້ນວ່າກອງປະຊຸມເວທີປຶກສາຫາລືວຽກງານປ້ອງກັນປະເທດແລະຄວາມໝັ້ນຄົງຈີນ-ອາຟຣິກກາຄັ້ງນີ້ຈະກາຍເປັນເວທີສຳຄັນສຳລັບຈີນ-ອາຟຣິກກາເພື່ອສະແຫວງຫາສັນຕິພາບ, ການພັດທະນາແລະສົ່ງເສີມການຮ່ວມມື, ພ້ອມທັງຈະປະກອບສ່ວນເຂົ້າໃນການສົ່ງເສີມສັນຕິພາບແລະສະຖຽນລະພາບຂອງອາຟຣິກກາກໍຄືຂອງໂລກ.
