 |
 |
 |
 |
|
|
|
|
ໂຄສົກສຳນັກງານຕຳຫຼວດແຫ່ງຊາດໄທກ່າວຫວ່າງມໍ່ໆມານີ້ວ່າ: ເຈົ້າໜ້າທີ່ຕຳຫຼວດປະເທດຕົນຈະສືບຕໍ່ພົວພັນກັບຕຳຫຼວດສາກົນເພື່ອສືບສວນຫາທ່ານນາງຍິ່ງລັກ ຊິນນະວັດ ອະດີດນາຍົກລັດຖະມົນຕີ ເພື່ອຈັບໂຕກັບຄືນປະເທດແລະດຳເນີນຄະດີ.
ກ່ອນໜ້ານີ້, ມີຂ່າວລາຍງານວ່າ ທ່ານນາງຍິ່ງລັກ ຊິນນະວັດໄດ້ວີຊາອັງກິດທີ່ມີອາຍຸໃຊ້ງານ 10 ປີ ແຕ່ໂຄສົກທ່ານນີ້ກ່າວວ່າ ເຈົ້າໜ້າທີ່ຕຳຫຼວດບໍ່ສົນໃຈຕໍ່ການລາຍງານຂ່າວດັ່ງກ່າວ ແລະເນັ້ນວ່າ ເຈົ້າໜ້າທີ່ຕຳຫຼວດໄທມີການພົວພັນ-ແລກປ່ຽນຂໍ້ມູນກັບ 190 ກວ່າປະເທດໃນໂລກມາໂດຍຕະຫຼອດ ເຖິງວ່າຈະໄລ່ລ່າເຖິງຟາກຟ້າຝັ່ງສະໝຸດກໍຕາມ ຈະຕ້ອງຈັບໂຕນາງຍິ່ງລັກໃຫ້ໄດ້.
ໂຄສົກທ່ານນີ້ກ່າວຕື່ມວ່າ: ປັດຈຸບັນຍັງບໍ່ຮູ້ຄັກແນ່ວ່າ ນາງຍິ່ງລັກຖືໜັງສືຜ່ານແດນປະເທດໃດ ແຕ່ສາມາດຢືນຢັນໄດ້ວ່າບໍ່ແມ່ນໜັງສືຜ່ານແດນປະເທດໄທຢ່າງແນ່ນອນ.
ກ່ອນໜ້ານີ້ ຄືວັນທີ 31 ພຶດສະພາຜ່ານມານີ້, ທ່ານສີວະຣາ ຮັງສິພຣາມະນະກຸນ ຮອງຫົວໜ້າສຳນັກງານຕຳຫຼວດແຫ່ງຊາດໄທ ເຄີຍກ່າວຕໍ່ການລາຍງານຂ່າວດັ່ງກ່າວວ່າ: ກະຊວງການຕ່າງປະເທດຕົນຍັງບໍ່ໄດ້ຢືນຢັນຂໍ້ເທັດຈິງຕໍ່ເລື່ອງນີ້ເທື່ອ ແຕ່ຖ້າວ່ານາງຍິ່ງລັກໄດ້ວີຊາອາຍຸ 10 ປີຈາກອັງກິດແທ້ ກໍຈະເຮັດໃຫ້ການຈັບໂຕກັບຄືນປະເທດເພື່ອດຳເນີນຄະດີນັ້ນສັບສົນຍິ່ງຂຶ້ນ.
 |
 |
 |