 |
 |
 |
 |
|
|
|
|
ທ່ານຕູ້ເຈ່ຍຫາວ ເລຂາຄະນະພັກ ທັງເປັນປະທານສະພາປະຊາຊົນແຂວງຫູໜານ ແລະ ທ່ານສີຕາເຈີ ຮອງເລຂາຄະນະພັກ ທັງເປັນເຈົ້າແຂວງແຂວງຫູໜານ ສປ ຈີນໄດ້ເຂົ້າຢ້ຽມຄຳນັບທ່ານບຸນຍັງ ວໍລະຈິດ ເລຂາທິການໃຫຍ່ຄະນະບໍລິຫານງານສູນກາງພັກປະຊາຊົນປະຕິວັດລາວ ປະທານປະເທດ ແຫ່ງ ສປປ ລາວ ຢູ່ນະຄອນສາງຊ່າ ເທດສະບານແຂວງດັ່ງກ່າວ ໃນຕອນຄ່ຳວັນທີ 1 ມິຖຸນານີ້ ແລະ ພ້ອມກັນເຂົ້າຮ່ວມພິທີເປີດກິດຈະກຳ "ນັກທ່ອງທ່ຽວພັນຄົນທ່ຽວລາວ" ແຂວງຫູໜານ ທ່ານຊົ້ງທ່າວ ຫົວໜ້າຄະນະພົວພັນຕ່າງປະເທດສູນກາງພັກກອມມູນິດຈີນກໍໄດ້ເຂົ້າຮ່ວມພິທີດັ່ງກ່າວເຊັ່ນດຽວກັນ.
ທ່ານສີຕາເຈີ ເຈົ້າແຂວງແຂວງຫູໜານ ໄດ້ກ່າວເນັ້ນວ່າ: ແຂວງຕົນຈະຕັ້ງໜ້າດຳເນີນກິດຈະກຳວັດທະນະທຳ, ທ່ອງທ່ຽວ ແລະການແລກປ່ຽນ-ຮ່ວມມືຕ່າງໆໃນຂອບ "ໜຶ່ງແລວໜຶ່ງເສັ້ນທາງ", ລົງເລິກການແລກປ່ຽນແລະຮ່ວມມືດ້ານການທ່ອງທ່ຽວກັບລາວ ແລະປະກອບສ່ວນອັນໃໝ່ໃຫຍ່ຫຼວງກວ່າເກົ່າເພື່ອຊຸກຍູ້ການຮ່ວມມືລະຫວ່າງສອງຝ່າຍໃນຂົງເຂດຕ່າງໆ ເຊັ່ນ ການໄປມາຫາສູ່ກັນລະຫວ່າງເມືອງແຮກສ່ຽວ, ການພົວພັນດ້ານເສດຖະກິດການຄ້າ, ການພັດທະນາອຸດສາຫະກຳ ແລະ ການແລກປ່ຽນວັດທະນະທຳ ກໍຄື ຮັດແໜ້ນໄມຕີຈິດມິດຕະພາບລະຫວ່າງສອງປະເທດຈີນ-ລາວ.
ຂ່າວລາຍງານຕື່ມວ່າ ໂດຍການຊຸກຍູ້ຈາກຂໍ້ລິເລີ່ມ "ໜຶ່ງແລວໜຶ່ງເສັ້ນທາງ" ແລະຍຸດທະສາດການຊຸກດັນການເປີດປະຕູແລະພັດທະນາກ້າວກະໂດດດ້ວຍການປະດິດສ້າງໃໝ່ຂອງແຂວງຫູໜານ, ການຮ່ວມມືລະຫວ່າງແຂວງດັ່ງກ່າວກັບລາວໃນຂົງເຂດຕ່າງໆໄດ້ມີການພັດທະນາຢ່າງວ່ອງໄວ ຄຽງຄູ່ກັບການເປີດບໍລິການເສັ້ນທາງການບິນໂດຍກົງລະຫວ່າງນະຄອນສາງຊ່າ-ນະຄອນຫຼວງວຽງຈັນ ແລະການສ້າງຕັ້ງສະຖານກົງສຸນໃຫຍ່ ສປປ ລາວປະຈຳນະຄອນສາງຊ່າ ພ້ອມດ້ວຍເສັ້ນທາງການບິນໂດຍກົງລະຫວ່າງນະຄອນສາງຊ່າ-ຫຼວງພະບາງ ຈະເປີດບໍລິການພາຍໃນປີນີ້ ການໄປມາຫາສູ່ລະຫວ່າງປະຊາຊົນແຂວງຫູໜານແລະລາວຈະສະດວກຍິ່ງຂຶ້ນ ການແລກປ່ຽນແລະຮ່ວມມືດ້ານວັດທະນະທຳກໍຈະສະໜິດແໜ້ນກວ່າເກົ່າເຊັ່ນດຽວກັນ.
 |
 |
 |